Shillong, Nailur:
Ka Himalaya Wellness Company, kawei na ki kompani ba paw bha ha kaba ïadei bad ka koit ka khiah, dang shen ka la pynbna halor ka jingjop jong ka ban thung haduh shi million tylli ki dieng ha kylleng ka India. Ïa kane ka kam la leh ha ka rukom kaba kyrpang bha kata ba ïa kine ki shi million tylli ki dieng la thung da ki nongtrei jong ka Himalaya Employees, kaba pyni ïa ka dak jong ka jingkit khlieh ka kompani ïa ka jingpynneh pynsah ïa ka mariang.
U Lt. Cdr. Deokant Payasi (Retd.), CEO and Trustee – SayTrees Environmental Trust, u la pynpaw, “Ka jingmyntoi jong kane ka jingïatehlok jong ngi bad ka Himalaya ha kine ki saw snem ka la long kaba khraw haduh katta kata. Kane ka sienjam kaba phai khmat sha ki shnong ki thaw, ym tangba ka la nang pynbun ïa ka jingdon jong ki dieng ki siej na ka bynta ka shnong ka thaw hynrei ka la ïarap ruh ban wanrah ïa ka jingpynduna ïa ki jingban khia ha ka jinglong jingman ka sawdong sawkun ha ki khlaw ba rben. Da kaba ïarap ban pynlong ïa ka jingpyndonkam ïa ka jaka kaba ïaineh, kane ka jingïatehlok ka pyni shisha ïa ka jingtrei ba radbah ban wanrah ka jingïabiang lang hapdeng ka jingdonkam jong ki briew bad ka mariang.”
U Padmanabha Hegde, u nongrep na Bekematha (Sirsi), u ong, “Ngi la sakhi ïa ka jingthung dieng kaba palat 1.7 lak tylli ha ka thaiñ jong ngi ha ka snem 2024. Don palat 100 jait ki dieng, kiba ai soi, dieng sawdong, dawai, jingbam ïa ki mrad, ki sla tyrkhong, ki pump um syntiew, bad ka umngap na ka bynta ki ngap. Ka la ïarap ban weng ïa ki jingeh kiba mih na ka daw jong ka jingwan jong ki mrad khlaw ha ki sngi ban wan, bad nalor ka jingpynneh pynsah ïa ka sawdong sawkun jong ki jingthaw ba-im. Ai khublei ïa ka Himalaya Wellness Company kaba ïarap ban kyrshan na ka bynta kane ka kam ba bha. Ngi, ki nongrep, bad kiwei kiwei ki seng bha lang na shnong ngi la myntoi shibun na kane ka sienjam, bad ngi kular ban ïada ia kine ki dieng kiba la thung.”
