Imphal, Nailur 01 (UNI)
Arngut ki briew ba kynthup ïa kawei ka kynthei ba 32 snem ka rta, ki la shah pynïap noh bad kumba 10 ngut kiwei pat – kham bun ki kynthei bad khynnah ki la mynsaw hadien ba ki lehnoh kieng atiar Kuki ki la thombor ïa ka shnong Koutruk bad kiwei-kiwei ki jaka ha ka Sngi U Blei.
Ha kane ka jingjia, 2 ngut ki pulit ki la mynsaw, ong ki pulit.
U nongthoh khubor jong kawei ka lad pathai khubor uba la leit ban buddien ïa kane ka khubor ha Koutruk u la ngat ha u ‘bomb’ uba la pynhap da ka jingpyndonkam ïa ki ‘drone’.
Kawei ka ‘Outpost’ jong ka Indian Reserve Battalion ka la shah thang ha ki lehnoh Kuki.
Ka Sorkar Jylla ka la ong ba la shim ïa ki sienjam ba kyrkieh ban tehlakam ïa ka jinglong-jingman bad pynshitom ïa kito kiba donkti ha ka ban thombor ha ka Sngi U Blei ha ka shnong Koutruk, Imphal West.
Ki pulit ka Manipur ki la ong ba ki lehnoh ki la pyndonkam bun tylli ki ‘Rocket-Propelled Grenade’ (RPG) da kaba pyndonkam ïa ki ‘drone’ kiba paka bha. Katba ïa ki ‘drone-bomb’ la ju pyndonkam ha ki por thma, kane ka jingjia ba dang shen ha kaba la pyndonkam ïa ki ‘drone’ ban kit ïa ki jingpynbthei pyrshah ïa ki bor ïada bad ki ‘riew paidbah ka la nang pynsniewdur shuh-shuh ïa ka jinglong-jingman.
Kiba mynsaw ki la ïathuh ba ka jingïasiat kaba jur ka la sdang na Kangpokpi distrik ha kaba kawei ka briew ka la shah siat ïap katba ka khun jong ka, ka la mynsaw.
Katba ki briew ki dang phet sha ki jaka ba kham shngaiñ, ki lehnoh Kuki ki la pynhap bun tylli ki ‘bomb’ lyngba ki ‘drone’. Ki lehnoh kieng atiar ki la hiar na ki jaka lum bad thang ïa ki ïing ki sem. Ki lehnoh Kuki ki la shim noh ruh ïa 6 tylli ki tiar siat. Kiba bun na ki ïing ha katei ka shnong ki la julor na ka jinghap ki ‘bomb’.
Ki la don ruh ki jingthombor ïa ki nongshong shnong ha Sekmai, Kadangband bad Serou.
Ki briew kiba sah ha ki jaka them, la ker sawdong ïa ki da ki jaka lum kiba bun ki dei ki Kuki.
Naduh ba sdang ka jingïakynad ha ka 3 tarik Jymmang, 2023, ki briew ba sah ha ki jaka them kim shym la ïoh lad ban mih shabar Jylla da kaba pyndonkam ïa ki surokbah. Kumba 31 ngut ki briew kiba leit tur sha ki jaka sah ki Kuki ki dang jah rngai haduh mynta katba 220 ngut ki briew ki la ïap bad 60,000 ngut kiwei pat ki la sakma.
Ki dur nalor ki dur khih jong ki lehnoh Kuki kiba thombor ïa ki nongshong shnong ha ryngkat ki tiar siat ka juk mynta, ‘drone’ ki la saphriang ha kylleng ka Jylla.
Ha kawei ka liang, ka tnad kam pohïing ka Manipur ka la ong ba kiba kum kine ki jingleh ban thaw jingkulmar hapdeng ki nongshong shnong (ba khlem tiar) da ki lehnoh Kuki la ïohi kum ka jingpyrshang ban pynthut ïa ki lad ki lynti na ka liang ka Sorkar Jylla ban wanrah ïa ka suk ka saiñ.
Ym lah ban kyntait ïa ka jingdonkti jong ki briew kiba tbit ha ka liang ki kor toknoliji, ong ki pulit.
