U P.A. Sangma u long u nongai mynsiem ïa kiba bun bad uba kyrshan radbah ka USTM: Hoque

Shillong, Nailur 01

Ka University of Science and Technology-Meghalaya (USTM) ka la kynmaw burom ïa u P.A. Sangma (Bam Kwai ha Dwar u Blei), Lamphang barim ka ïingdorbar Lok Sabha bad Myntri Rang-bah barim ka Jylla, ha ka jingïalang kaba la long ha ka Sngi U Blei.

Kane ka jingïalang ka long ruh kum shi bynta jong ka jingrakhe ïa ka lyngkhuh sngikha ba 77 snem jong u.

Ïa u Sangma la kynmaw kum u ‘Statesman’ uba tbit bad ka nuksa kum ka jingai mynsiem bad la kynmaw burom ïa u ha ryngkat ka jingbuh syntiew da ka longïing ka USTM baroh kawei.

Haba ïadei bad kane, u Mahbubul Hoque, Chancellor ka USTM u la kdew halor ka jingktah jong ka jingim u P.A. Sangma ïa kiwei bad ong ba u la ai mynsiem ïa kiba bun bad uba la kyrshan radbah ïa ka USTM naduh ba la sdang ïa ka.

“Ka jingkynmaw ïa u ka long ka jingshai kaba lam lynti ïa ngi,” la ong u Hoque da kaba bynrap ba ka P.A. Sangma International Medical College & Hospital, kaba la mynjur da ka Kynhun Myntri ka Sorkar Jylla, kan long ka jingkynmaw burom ïa ka jingim jong u P.A. Sangma (Bam Kwai ha Dwar U Blei).

Na ka liang u Prof. G.D. Sharma, Vice Chancellor ka USTM, u la ban jur halor ka jingminot ka skulbah ban pynneh bad kynmaw burom ïa u P.A. Sangma da kaba ong, “Ha USTM, ngi kynmaw burom ïa ka jingim jong u lyngba ka jingpynïeng ïa ka ‘Chair for Tribal Research’ bad da kaba ai nam ïa kawei ka Block jong ka skulbah ha ka kyrteng jong u. Kine ki jingpyrshang ki pyntikna ba ki pateng ban wan kin bteng ban bud nuksa na ka jingim bad ki nongrim jong u.”

Shuh shuh ka Dr. Rashna Dass Hazarika, Medical Superintendent ka PIMC, ka la pynsngew bad ïaroh ïa u Sangma kum u nongïalam uba ïohi jngai bad u nongseng jong ka National People’s Party (NPP) – ka seng heh saiñ pyrthei ka ri banyngkong eh na ka Thaiñ Shatei Lam Mihngi.

“Ki kam ba bha jong u ki ïai bteng ban ai mynsiem ïa ngi, ba ngi da sngewnguh shi kat dei eh ïa u,” ka la ong.