Ba kiew kynsan ka um ha wah Porjalem, shah rong ka longkmie, lait im 3 ngut

Nongstoiñ, Nailur 02

Kawei longkmie ka la duh noh ïa la ka jingim hadien ba shah rong um ha kawei ka wah kaba la tip kum ka ‘Porjalem’ kaba dang hap ruh hapoh ka shnong Mawkawah ha West Khasi Hills.

Katkum khubor ba la ïoh lum na ki heh pulit ka District, la ïathuh ba kane ka jingjia ka la jia ha ka 2 tarik mynta u bnai, hadien saw ngut ki briew kiba sah hapoh ka dong Nondein jong ka shnong New Nongstoiñ, ki la hiar sha katei ka wah ban leit saitjaiñ. Hynrei la ong katba ki dang saitjaiñ kynsan-kynsan ka la sdang ban slap bad ka um ruh ka la kiew kynsan bad dei ha kane ka por haba ki la pyrshang ban mareh sharud wah ban lait na kino-kino ki jingjia, hynrei ha katei ka por kumno-re-kumno ka Kong Rilinda Symbei ba dang 24 snem ka rta, ka la shah rong noh ha ka um katba 3 ngut kiwei pat ki la ïoh ban phet.

Shuh shuh ka khubor ka ïathuh ruh ba hadien katei ka jingjia, ki pulit ka Nongstoiñ ha ryngkat ki pulit na ka tnat Fire and Emergency Service ha ka jingdonlang ki paidbah ki la hiar sha katei ka jaka bad ha ka jingïakhun ban wad ha ka por kumba 4:30 janmiet eiei la lap noh ïa ka met ïap jong katei ka longkmie narud jong katei ka wah kaba sahkut hapdeng ki mawsiang.

Ïa ka met ïap jong katei ka longkmie la pynkit noh sha Civil Hospital Nongstoiñ na ka bynta ban pyndep ïa ki jingdonkam katkum ki kyndon aiñ.