Nongpoh, Nailur 02
Ka Joint Action Committee (JAC) jong ka Seng Samla bad Seng Kynthei ka shnong Umsaw Nongbri ha Ri Bhoi District, ki la ai por shi bnai ïa ka kompeni Bharat Sanchar Nigam Limited (BSNL) ban pynpra ïa u Tower jong ka u bym treikam shuh mynta da ki phew snem bad kylla long ka jingma ïa ki paidbah nongshong shnong.
Kitei ki nongïalam kiba la mih paidbah mynta ka sngi ki la pynpaw ïa ka jingsngewsyier mynsiem halor ka jinglong-jingman jong u Tower uba tlor bad khih bad buh jingma shi kat dei ïa ki paidbah nongshong shnong namar ka jingdon jong u marjan bad ki ïing briew, ïing skul, ïing dorbar, ka anganwadi bad ïingmane.
Ki la ïathuh ruh ba ha ka por ba ka wan ka lyer ba jur, la sakhi ruh ba ki don ki bynta jong utei u Tower kiba la hap bad ba kitei ki nar ki la shong synjor. Ka ju don ruh ka jingsawa la kumba un kyllon bad hap noh na ka por sha ka por kaba lah ban wanrah ïa ka jingjia kaba sngewsih.
Shuh shuh ki nongïalam ki la ïathuh ruh ba ha ki por bad ki snem kiba la dep, lyngba ka shnong bad ka Balang Presbyterian, ki la dep ban ai da ka jingthoh sha ki bor ka BSNL ban pynpra noh ïa u Tower u bym treikam shuh da ki phew snem mynta naduh ba la shna ïa u ha u snem 2007. Pynban kat haduh mynta ruh ki bor ka BSNL ki khlem pat leh eiei bad ieh khongreng ha katei ka jaka kaba hap ha ka dong Lum jong ka shnong Umsaw Nongbri.
Halor kane ka bynta, ka JAC ka la ai por shi bnai ïa ka kompeni BSNL ba kan leh ïa kaba donkam ban pynpra bad law noh ïa utei u Tower lym kumta, na ka liang ka jong ki kim banse ban shim pat da kiwei ki sienjam kiba kham tyngeh.
