Khliehriat, Nailur 02
Ki Village Employment Council (VEC) bapher bapher ba hap hapoh ka Lumshnong C&RD Block ki la shim ïa ka sienjam bad rai ban sangeh pyntrei ïa ka skhim bylla 100 sngi ne MGNREGS jong u snem 2024.
Ha u kyrwoh ba la pyllait da ka VEC Association kiba don hapoh Lumshnong C&RD Block, ki la pynpaw ba ka Lumshnong C&RD Block kaba dang hap hapoh ka jingkhmih jong ka Wapung C&RD Block ka la shah leh bym kheiñ snep ha u BDO jong ka Wapung Dr. T Shylla.
Ka VEC Association ka la kynnoh ba une u BDO um shah ïa ki VEC kiba don hapoh ka Lumshnong C&RD Block ban pynrung ïa ki ‘materials bill’ jong ki, hadien ba ki la dep pyntrei ïa ki projek MGNREGA ha shuwa snem mang tyngka 2023-2024.
Wat hadien kane ruh, um shah ïa ki materials bill jong ki shnong bapher bapher ba don hapoh Lumshnong C&RD Block ban phah ïa ki Utilization Certificate (UC) sha ka Wapung C&RD Block.
Ki VEC jong ka Lumshnong C&RD Block ki la kylli na utei u BDO halor ka jingbym shah ban pynrung ïa ki material bill jong ki, hynrei ka jubab kaba ki ïoh na BDO ba dei na ka State kaba ym shah ban pynrung ïa ki bill jong ki.
Hadien ka jingïai shah kaba da ki snem, ki nongkitkam jong ki VEC Lumshnong C&RD Block Association ha ka 27 tarik Nailar, 2024, ki la leit ban ïakynduh ïa ka Joint Mission Director jong ka State Rural Employment Society (SRES), ka Kong I Diengdoh. Ka la pynshai ba kam don kano-kano ka aiñ kaba khanglad ban pynrung ïa ki material bill jong ki VEC ha ka Lumshnong C&RD Block bad kaba kham lyngngoh ka long ba ym shym la pynkynriah ïa ka Lumshnong C&RD Block na ka Wapung C&RD Block.
Ka Joint Mission Director ka la ïathuh ba ka bai mar (materials) jong baroh ar tylli kine ki Block kaba duna kumba haduh T.15 klur la dep ban pyllait ha ka Financial Year 2023-2024, bad ka Lumshnong C&RD Block ruh la mang kyrpang namar ba dang dei ka Block ba thymmai.
Ka Association ka pynpaw ka jingsngewnguh ïa ka sorkar jylla namar ka jingpyllait ïa katei ka pisa.
Ka jingeh ka long ba kane ka jingleh u BDO ba um shah wat tang ban pynrung ïa ki material bill jong ki VEC kiba don hapoh Lumshnong C&RD Block, kala khanglad ïa ki VEC ban pyntrei ïa ka MGNREGA kaba ai jingmyntoi sha ki thaiñ nongkyndong.
Ki don ruh ki VEC kiba sahteng ka bai material naduh u snem 2021-2022, 2022-2023 & 2023-2024.
La kynnoh ba na ka daw ka jingleh shilliang une u BDO, ka la pynlong ïa ki VEC ban rai ban sangeh shwa ban trei ïa ka MGNREGA ha u snem 2024.
Ka Association ka la ïathuh ruh ba une u BDO ym ju khot jingïalang ïa ki VEC kiba don hapoh Lumshnong C&RD Block, kaba la buh jingeh ïa ki shnong ban pynïaid beit ïa ki jingtrei hapoh ka Block.
