Shillong, Nailur 02
Ki Myntri ka Sorkar Pdeng kiba kynthup ïa u Myntri ka tnat jngohkai u Gajendra Singh Shekhawat bad u Myntri Khynnah kane ka tnat u Suresh Gopi lem bad ki Myntri Sorkar Jylla ka Thaiñ Shatei Lam Mihngi kiba peit ïa ka tnat jngohkai ki la ïakynduhlang ha nongbah Shillong ha ka Lah Sngi U Blei ban ïatai halor ki jingeh kiba ïakynduh, bad ki lad kiba dei ban shim kabu na ka kam jngohkai bad kyntiew shuh shuh lyngba ka jingwanrah ïa ka jingïatreilang.
Ha kane ka jingïalang kaba la pynlong ha Vivanta, Khyndai Lad, la shim ruh ïa kawei ka sienjam kumno ban wanrah ïa ka jingïatreilang hapdeng ka Thaiñ Shatei Lam Mihngi bad ka Andaman bad Nicobar Islands na ka bynta ban kyntiew ïa ka kam jngohkai.
Ha kane ka jingïalang, ki Sorkar Jylla na ka Thaiñ Shatei Lam Mihngi ki la pyni la ki jong ki jingbatai halor ka jingdon ki jaka jngohkai kiba itynnat bad ka jinglah ban khring ïa ki nongjngohkai bad ka jingnang bun kiba wan jngohkai ha kine ki snem hadien ka khlam COVID.
La ïasam ruh ïa ki jingshemphang bad ki jingtip kumno ban kyntiew ïa ka kam jngohkai pyrthei da kaba ïatreilang bad ki Jylla bapher bapher khamtam hapdeng kane ka Thaiñ bad ka Andaman & Nicobar Islands.
Na liang u Shekhawat u la ong ba kawei-pa-kawei ka Jylla ka don la ka jong ban kyntiew ïa ka kam jngohkai bad ai ka jingïaroh ïa ka jinglut jingmut jong ki Jylla ban pynpoi sha ka thong ban kyntiew ïa ka kam jngohkai wat hapdeng ki jingeh kum ka jingbym pat biang ki lad jingpynïasoh, bad ka jinglong jingman ki jaka ha kine ki jaka ba long lum.
U la ong ba ka Sorkar Pdeng ka la mang ki song jingïarap bakyrpang ïa ka Thaiñ Shatei Lam Mihngi lyngba ka rukom mang pisa kaba long 90:10 bad ki don bun tylli ki skhim ban kyntiew ïa ka kam jngohkai kynthup ka Swadesh Scheme.
Na ka liang u Myntri ka tnat jngohkai ka Jylla u Bah Paul Lyngdoh u la pynpaw ba ka Meghalaya ka dei kaba la kyrkhu lyngba ka jingdon ki jaka kiba itynnad kiba khring ïa ki nongwan jngohkai bad ka dei ka jaka jong ki krem kiba phylla kynthup ïa ka krem Mawmluh kaba la ithuh da ka UNESCO, kaba khring ia ki nongrung krem na kylleng ki ri ka pyrthei.
U Bah Paul u kren ruh shaphang ka tynrai jong ki briew ka Jylla kiba don ka mynsiem sbun bad kloi ban pdiang sngewbha ïa ki nongjngohkai bad ka jingdon bynta lang jong ki paidbah ka dei ka bynta kaba kongsan tam eh ha ka jingpyrshang ban kyntiew ïa ka kam jngohkai.
U la ong ruh ba ka kam jngohkai pyrthei ka dei kaba ar kaba lah ban ai kam ai jam ha ka jylla Meghalaya, bad ka jingthmu jong ka Jylla ka long ban pynkylla dur ïa ka Jylla sha ka jaka jngohkai kaba ka India ka kham jied bad phaikhmat bha.
Na ka liang ka Sorkar Jylla ka la pynpaw ruh ba ha kine ki snem ba la dep, ka Meghalaya ka la paw kum ka jaka kaba itynnat ha ka map leit jingleit jong ka ri India.
“Haduh u snem 2023, ka kam jngohkai pyrthei jong ka Meghalaya ka la ai kam ïa ki 50,084 ngut ki nongshong shnong katba ka jingkynshew tyngka ka la poi sha ka T.465 klur ha kine ki lai snem ba la dep. Shwa ban sdang ka khlam COVID-19, ka kam jngohkai pyrthei ka la mad ïa ka jingkiew kaba phylla kaba kot haduh 7.34 percent shisnem, kaba la khmih lynti ba kan wanrah ïa ka jingkiew kaba jur ha kine ki san snem ban wan. Ka kam jngohkai pyrthei ha Meghalaya ym tang ba ka prat lynti ïa ki kam pynroi ha jylla, hynrei ka pynmih ruh ïa ka jingai kam ai jam kaba kot haduh 50,000 tylli. Ka Meghalaya ka la pynleit jingmut ruh ha ka kam jngohkai pyrthei kaba neh ha kaba ki jingthmu ba kongsan kum ka Community-Led Tourism Infrastructure Development Scheme, ka jingpynroi ia ka kam jngohkai mariang, bad ka jingpynjanai ia ka rukom lum ia ki jaboh jabaiñ,” la pynpaw ka asoeksr ha u kyrwoh lyngba u Director ka tnat jngohkai u Bah CVD Diengdoh.
La batai ruh shaphang ka Meghalaya Grassroots Music Project (MGMP) kaba don ka bynta kaba kongsan na ka bynta ban kyntiew ïa ka kam jngohkai pyrthei ha Meghalaya bad lyngba ka put ka tem ka plielad ïa kiba donsap ban don ha ki rynsan kiba kham heh bad ha kajuh ka por ka khring ïa ki nongjngohkai pyrthei.
La ïoh ruh ïa ka jingïakren na ki Myntri ka kam jngohkai pyrthei kiba dei na ki jylla ka Thaiñ Shatei Lam Mihngi nalor ki ophisar ka Sorkar Pdeng u Suman Billa, uba dei u Additional Secretary Ministry of Tourism, ka Mugdha Sinha, IAS, Director General ka Ministry of Tourism jngohkai pyrthei, Bah MR Synrem uba don hapoh ka tnat Tourism ka Sorkar Pdeng nalor kiwei kiwei ki ophisar na ki Jylla bapher bapher.
