Shillong, Nailur 02
U Myntri uba peit ïa ka tnat jngohkai ka Sorkar Pdeng u Gajendra Singh Shekhawat u la ong ki Jylla ha ka Thaiñ Shatei Lam Mihngi ki dei kiba shngaiñ tam ha pyrthei na ka bynta ki nongjngohkai ba kin leit shangkai bad u la bynrap ba hadien ka jinglynshop ka khlam COVID, baroh ki Jylla ki nang kiew ha ka jingwan kiba jngohkai lait noh tang ka Manipur kaba don hapdeng ka jingïakynad.
Haba kren sha ki lad pathai khubor hadien ka jingïalang jong ki Myntri Sorkar na ka Thaiñ Shatei Lam Mihngi kiba khmih ïa ka tnat jngohkai ha nongbah Shillong ha ka Lah Sngi U Blei, u Shekhawat u la ong ba baroh ki Jylla ka Thaiñ Shatei Lam Mihngi ki long kiba biang ka jinglong-jingman ha ka liang ka shongsuk-shongsaiñ lait noh tang ha Manipur kaba mad ïa ka jingkynad mynta la katto katne por. U la ong ba baroh ki briew kiba wan shangkai sha kane ka thaiñ ki la leit phai ha ryngkat ki jingkynmaw kiba babha bad ki don ruh ka jingthmu ban wan jngoh biang ban mad ïa ka jingitynnat jong ki jaka jngohkai.
Halor ka jingkylli la ka jingpyntreikam ïa ka Inner Line Permit (ILP) ka long ka jingkhanglad ban kyntiew ïa ki kam jngohkai ha ka Thaiñ Shatei Lam Mihngi, u Shekhawat u la ong ba ka Sorkar kan thaw kumno ban shim ki lad ban pynbeit ïa kane bad u kiar ruh ban jubab halor ka jingdawa pyntreikam ïa ka ILP ha Meghalaya.
Haba kylli la ka jingumsnam ha Manipur ka ktah ïa ka Thaiñ Shatei Lam Mihngi ha ka liang ka kam jngohkai, u Shekhawat u la ong ba lait noh tang ka Manipur, kiwei pat ki Jylla ki la batai kumno ka jingwan ki nongjngohkai ka la nang kiew lada kheiñ tang hapoh shisnem lane hadien ka jinglynshop ka khlam COVID.
U la ong ruh ba ka India kum ka jaka jngohkai ka don ha ka kyrdan banyngkong napdeng ki ri ha South East Asia Pacific bad kam don satia ka jinghiar ha ka jingwan ki nongjngohkai.
Halor ka jingmaham ka USA ban nym leit jngohkai ha ki katto katne tylli ki Jylla ka Thaiñ Shatei Lam Mihngi, une u Myntri ka Sorkar Pdeng u la ong ba um kwah ban kynthoh ïa kata, hynrei kaei kaba u don ban ong ka long ba baroh ki Jylla ka Thaiñ Shatei Lam Mihngi ki long kiba shngaiñ ban wan jngohkai bad ïa kane la lah ban sakhi ruh na ka jingkren jong kito kiba la wan jngohkai ïa ki jaka ha kane ka Thaiñ bad ki durkhih kiba ki la pyni ha kaba ki batai ba ka Thaiñ Shatei Lam Mihngi ka long kaba shngaiñ bha ban leit jngohkai.
U la ïathuh ruh ba ka Sorkar Pdeng ka dang pynkhreh ban pyntreikam ïa kawei ka skhim kaba thymmai na ka bynta ban kyntiew ïa ka kam jngohkai ha ki jaka khappud bad ïa kane yn leh lang hapdeng ka tnat jngohkai bad ka tnat kaba peit ban ïada ïa ka ri. U Shekhawat um pat ïathuh kyrteng ïa kata ka skhim thymmai.
