Shillong, Nailur 02
Ka Synjuk ki Shiphew Dorbar Shnong kiba hap hapoh ka West Shillong Constituency ka pynpaw ïa ka jingpyrshah bad pynrem jur ïa ka bar jylla kaba la nud ban pharep bad bym kheiñ snep shuh ïa ki Dorbar Shnong (DS) da kaba ujor ejahar pyrshah ïa u Secretary ka Dorbar Shnong Nongsohphoh Upper Mawprem.
Ha ka kyrwoh khubor ba la pyllait da u Chairman ka Synjuk ki Shiphew Dorbar Shnong u Bah W Pyrbot u la ong, ka jingïalang ba kyrkieh ka Synjuk kaba la long ha ka 30 tarik u bnai ba la lah, ka la ïakren bad shimkhia halor ka jingai ne ujor ejahar da kawei ka bar jylla pyrshah ïa u Secretary ka Dorbar Shnong Nongsohphoh Upper Mawprem ha kaba ïadei bad ka jingjia ha ka 17 tarik mynshem bnai.
U la ong kum ka Synjuk haba pynpaw ïa ka jingpyrshah bad pynrem ïa katei ka bar jylla, ka la kyntu pat ïa ka sorkar jylla ba kan shimkhia ïa kane ka kam khnang ban khang bad ban nym ailad ïa kum kine ki briew kiba ïaleh pyrshah ïa ki jingthmu ba bha jong ki dorbar shnong.
Nalor kane u Bah Pyrbot u la ong, ym lah ban len ba ka jingdon ki dorbar shnong ha man ki shnong ki thaw ka la pynsuk shisha ïa ka sorkar jylla ym tang ban wanrah ïa ka roi ka par, hynrei kiba peit ruh ïa ka bha ka miat, ka shongsuk-shongsaiñ, khamtam ka jingwan rung beaiñ ki bar jylla bad ka jingjyllei u jingdih pynbuaid, u drok.
Namar kata, u la ong ka Synjuk ki Shiphew Dorbar Shnong ka kyrmen bad shaniah skhem ba ka sorkar jylla kan shim ïa ki lad ki lynti ban ai jingïada ïa ki dorbar shnong kiba ju ïatreilang bad ka sorkar na ka por sha ka por khnang ban rat dyngkhong ïa kum kine ki jaidbynriew kiba thmu ban wanrah ïa ki jingsniew ba har rukom.
