Shillong, Nailur 03
Ka tnat Shillong Traffic Police (STP) ka la pynbeit ïa ka rukom ïaid kali bathymmai kum ka jingpyrshang shipor ha ka thaiñ Polo hadien ba jur ka dheng kali ïa kaba ym lah pynduh khamtam ha ka por ba ïa beh kam ki briew.
Kane ka jingpyrshang bathymmai kan sdang treikam naduh ka 6 tarik mynta u Nailur naduh ka por 7 baje mynstep haduh 9 baje mynmiet.
Halor kane ka rukom pynïaid kali thymmai ha Polo Point, yn ym shah shuh ïa baroh ki jait kali ban khun sha ka liang kamon na Polo Point kiba wan na lad Saw Furlong bad lad Matri Mandir kiba thmu leit sha lad CRPF bad lad Merin’s Restaurant bad sha kiwei ki jaka.
Ki kali ki dei ban ïaid beit bad khun sha kadiang bad bud beit ïa ka surok sha Majestic Hotel bad shim ka lad sha kamon sha lad Oakland Post Office bad ka lad CM’s Bungalow bad noh sha lad Polo Towers bad Polo Point.
