Shillong, Nailur 03
Kumba baroh ki tip ïa ka nongbah Shillong kum ka “Rock Capital of India” namar ka jingieid jong ka ïa ka rwai ka siaw bad ka put ka tem. Kumta kum shibynta ban wanrah bad pynim biang ïa ki sur jingrwai barim-bajah, ka Opus Productions ha ryngkat ka jingïatreilang bad ka Meghalaya Tourism bad ka Meghalaya Grassroots Music Project kan sa pynlong ïa ka tamasa tem-put ïa kaba la tip kum ka “Yesterday Once More” ha ka 7 tarik u Nailur 2024 ha ka por 6 baje janmiet ha U Soso Tham Auditorium.
Haba kren sha ki lad pathai khubor ha ka 3 tarik u Nailur 2024 ha Shillong Press Club, u Bah Andreas War uba dei u Organising, u la ong ba ka jingpynlong ïa kane ka prokram tem-put ka long ban ai rynsan bad kyntiew ïa ki samla kiba tbit ha ka liang ka rwai-ka siaw bad ka put ka tem khnang ba kin kiew kham shalor.
“Ha kane ka juk kaba mynta, ngi ïohi ba kiba bun ki nongrwai bad nongtem ki kham pynleit jingmut bha ha ki jingrwai kiba ïaid katkum ka juk kaba mynta bad ki jingrwai pat ki la sdang ban jah noh,” la ong u Bah Andreas.
U Bah Ribor Mb uba dei u Artist Manager, u la ong ba la pynlong ïa kane ka prokram khnang ban pynim biang ïa ki sur jingrwai bad jingput-jingtem kiba la rim bha kiba naduh ki snem 1950 haduh ki snem 1990.
Ha katei ka sngi kin sa don ki nongrwai bad nongput nongtem kiba kynthup ïa u Barry Mawthoh, Melvynn Pathaw, Sarah Lee, Cathleen Maya Laloo, Haphida, Lawan Kharbuli, Osmond, Bala Ryntathiang, Neil Umwi, Ribor Mb, Raphael Myrtong nalor kiwei-kiwei.
Ha katei ka sngi kan sa don ruh ka ïew ïadie-ïathied ïa ki bam ki dih nalor kiwei-kiwei ki prokram bad ka bai rung ha katei ka sngi ka long T.200 marwei kaba lah ban ïoh napoh katei ka jaka ka ban sa long ïa katei ka prokram.
