Shillong, Nailur 03
Ki nongïalam jong ka Dorbar Shnong Bangla Sohphie, Sohïong Lyngdohship East Khasi Hills District ha ka 3 tarik u Nailur 2024, ki la leit ban ïakynduh ïa u Deputy CEM ka KHADC, u Bah PN Syiem halor ka phang ban pynbeit lane wanrah noh ïa ka EPIC Card jong ka shnong Bangla Sohphie na 30-Mairang Constituency Eastern West Khasi Hills District sha ka 23-Sohïong Constituency East Khasi Hills District kaba la buh jingeh ïa ki nongshong shnong namar ka EPIC ka hap shapoh Eastern West katba ki kam ki jam baroh ki hap shapoh ka Sohïong Block.
Haba ïakren bad ki nongïalam jong ka Dorbar Shnong hadien ka jingïakynduh ïa u Dy CEM ka KHADC, u Bah Albinus Mawlong, Sordar Shnong Bangla Sohphie u la ong ba kane ka jingdon ka ‘vote’ jong ki sha Mairang, Eastern West Khasi Hills District ka la wanrah jingeh shibun ha kaba kum ki nongshong shnong ki ïakynduh la ka long ha kaba ïadei bad ki kot ki sla ban pyndap sha ki ophis namar ki kot ki sla ki dei napoh ka Sohïong Block katba ka EPIC pat ka hap shapoh ka Mairang Eastern West Khasi Hills District.
“Ka shem jingeh haba ïadei bad ki jingdonkam jong ka shnong ka thaw baroh kawei namar ka EPIC ka hap shapoh Eastern West, hynrei ha kaba ïadei pat bad ki kam jong ka Block baroh naduh u khaw rashon, ka jingbylla kaba 100 sngi haduh ki skhim bapher-bapher, la ïoh napoh ka Sohïong Block”, la ong u Bah Mawlong.
U Bah Mawlong u la ïathuh ba ka dei naduh u snem 2013, kitei ki nongshong shnong ki la hap ban thep ‘vote’ sha Mairang Constituency katba shwa utei u snem pat ki la hap beit hapoh ka Sohïong Constituency.
Shuh shuh u la pyntip ba na ka liang u Dy CEM u la ong ba un sa shimkhia halor kane ka bynta bad ha kine ki khyndiat sngi kin sa ïashong da ka jingïalang ban ïa pynbeit ryntih ïa kane ka kam namar ïa ka jingshim rai yn nym leh tang da ma u marwei shimet.
Na ka liang u Bah Sherbestar Kharthangmaw, Assistant Secretary Shnong, u la ong ba wat ki skhim MDC ruh kim ju ïoh shuh mynta la 10 snem eiei katba kiwei pat ki shnong ki ïoh na ka por sha ka por.
“La 10 snem ngi khlem ïoh ïa ka MDC skhim, baroh-baroh ki ïoh ïa ki skhim hynrei tang ka shnong jong ngi ka bym ju ïoh ïa ki skhim, halor kata ka nongrim, ngi kwah ba ki dei ban pyrkhat lem na ka bynta jong ngi ki nongshong shnong”, la ong u Bah Kharthangmaw.
U la ong ba na ka liang ki nongïalam shnong ki la kyrpad na u Dy CEM ba u dei ban shimkhia lane ban pynbeit mardor ban wanrah ïa ki EPIC shwa ka ilekshon MDC ka ban sa wan ban pynpoi noh ïa ka shnong jong ki shapoh ka Sohïong Constituency.
U Bah Kharthangmaw u la ïathuh ba na ka liang ka shnong ka la aiti da ka jingthoh sha ka Delimitation Committee ha ka 13 tarik u Naiwieng 2023 ba kan pynkynriah noh ïa katei ka shnong Bangla Sohphie sha ka Sohïong Constituency hynrei namar ka jingdon ka jingbym hun na ki katto-katne ngut, la pynrung noh ïa katei ka jingïakren ha ka Select Committee kaba la pynsahteng pat ïa kane ka jingïakren haduh kine ki sngi ba mynta.
