Mawkyrwat, Nailur 03
Tang hadien shi taïew tam ka jingwan jong u Myntri Khynnah ka Sorkar Kmie uba khmih ïa ka tnat Jal Shakti u Dr. Raj Bhushan Choudhary ha Mawkyrwat ha ka 3 tarik Nailur, 2024 sa u Myntri ba khmih ïa ka tnat Riti Dustur bad ka tnat kam Jngohkai Pyrthei ka Sorkar Kmie, u Gajendra Singh Shekhawat u la leit ban jngoh ïa ka South West Khasi Hills District ha ryngkat ka jingdonlang u MLA ka thaiñ u Bah Renikton Lyngdoh Tongkhar, Bah B Mawlong, Deputy Commissioner lem bad kiwei kiwei ki ophisar.
Ha kane ka sngi, u Myntri u la leit jngoh ïa ki jaka jngohkai bapher bapher, kynthup ïa ka Hot Spring kaba don ha ka shnong Jakrem, ka Synrang Mawrin kaba don ha ka shnong Mawten, ka Mawkyrduk Monolith (Tynrong) kaba don ha ka shnong Mawlangwir, bad ka Mawranglang Viewpoint kaba itynnad kaba don ha ka shnong Mawranglang.
U Gajendra Singh haba kren sha ki lad pathai khubor u la ai ka jingïaroh kaba kyrpang ïa ka jingitynnad jong ka kolshor bad ka mariang jong ka jylla Meghalaya.
U la kyrpad ïa baroh ki nongjngohkai pyrthei ba kin wan jngoh ïa ka jylla Meghalaya bad u la ong ruh ba ka Meghalaya ka don ïa ka jingkyrmen kaba khraw ban kyntiew ïa ki kam jngohkai pyrthei. “Wan ban sakhi dalade ïa ka Meghalaya, ka Jylla ba dap da ka jingitynnad naduh ka kolshor haduh ka mei mariang,” la ong u Gagendra Singh.
Une u Myntri u la pynpaw ba ka thong ba hakhmat jong ka sorkar kmie hapoh ka jingïalam u Narendra Modi ka long ban kyntiew ïa ka kam jngohkai pyrthei ha ka thaiñ shatei lam-mihngi.
Shuh shuh u la ong ruh ba ka jingpynroi ïa ka kam jngohkai pyrthei kan sa wanrah ïa ka jingkylla kaba khraw ha ka jingim jong ki nongshong shnong ha kaba kan don ka jingkiew ha ka ïoh ka kot, ka jinglong jingman jong ki kan long ka jingkylla bad kyrmen ba ha ki por ban wan, ka kam jngohkai pyrthei kan long ka nongpynïaid ïa ka ïoh ka kot ha ki jylla shatei lam-mihngi.
Ha katei ka sngi u Myntri u la pynlong ïa ka jingïalang ha Circuit House Mawkyrwat bad ki ophisar jong ki tnat sorkar bapher bapher jong ka South West Khasi Hills.
Ha kane ka sngi la ïoh ruh ban ai ïa ka dorkhas (memorandum) sha u Myntri da u Bah Renikton Lyngdoh Tongkhar, ha ryngkat ki nongmihkhmat na ka Dorbar Shnong Mawten, u Principal ka Sngap Syiem College Mawkyrwat.
Ha katei ka sngi la pynphuh-pynphieng shuh shuh ïa ka prokram da ki jingshad tynrai, ba kynthup ïa ki jingrwai jong ‘Sur Ki Nongkyndong’ bad ki jingshad tynrai jong ka Ri-Maram Folk Academy.
