Shillong, Nailur 03
U Superintendent of Police (SP) jong ka East Khasi Hills, Bah Sylvester Nongtnger ha ka Sngi Ba-ar u la pyntip ba ka samla kaba la shah thombor ka dei ka paralok bad uwei napdeng kiba la kynnoh thombor, kaba la leit sha ka ïingsah jong u kaba don ha Malki.
Na ka liang jong u SP u la pyntip ba kane ka jingjia ka la jia ha ka ïingsah jong utei uwei kaba ha Malki ha ka por bym don briew ha ïing bad dei ha kane ka por sa uwei u paralok jong u, u wan poi ha kane ka ïing bad ban ïadon bynta lang ha kane ka kam bymman.
Kane ka jingjia ka la jia ha ka 29 tarik mynshem bnai. Ha ka sngi kaba bud pat la ujor ïa kane jingjia ha thanat Laitumkhrah ha kaba na ka liang jong ki pulit ruh ki la shim khia mardor bad ban ïoh kem noh ïa uwei ha kane ka juh ka sngi bad ïa uwei ruh uba la suba donkti pat la kem hadien shisngi na Smit.
Ïa kine ar ngut kiba la suba donkti ha kane ka kam, la ïalam hakhmat ka ïingbishar, ha kaba la rai ban set 14 sngi hapoh ka Judicial Custody. U SP u la pyntip ruh ba ki pulit ki dang trei shitom ban ïoh pyndep noh ïa ka chargesheet hapoh ar bnai katkum ka jingdonkam jong ka aiñ.
Ha kawei pat ka liang, u SP u la buh ka jingkyntu ruh sha ki paidbah ba kin wan shakhmat ban pyntip ïa kino-kino ki kam thombor pyrshah ïa ki kynthei khynnah sha ki pulit.
