Shillong, Nailur 03
Uwei u rangbah ïa uba la tip kyrteng kum u Santosh Das, 38 snem ka rta uba shong ba sah ha Riat Laban, u la duh ei noh ïa la ka jong ka jingim hadien ba u la syntuid bad hap shapoh ka riat.
Katkum ka jingtip kaba la ïoh lum la ong ba kane ka jingjia ka la jia ha ka janmiet jong ka Sngi Ba-ar katba une u rangbah uba don hapdeng ka jingpang u dang thmu ban leit bar (paiñkhana) da ka jingsynran lang jong u para jong u. Hynrei, kyndit-kynsan u la syntuid ka kjat bad hap jraiñ shapoh ka riat kaba ki ju khot ka Them U Kwar Syndah bad ka lum jingthang kaba don hajan ka Sanbor Shullai Road.
Halor kane, na ka liang ki bahaïing mar-mar ki la pyntip sha ki pulit bad na ka liang ki pulit SDRF ruh mar-mar ki la wan poi sha kane ka jaka bad hadien katto-katne por ba ki la wad kin sa ïoh ban sei noh ïa ka met jong u shajrong ka jingkieng.
Hadien ba la ïoh sei ïa ka met jong une u rangbah la pynkit noh sha Civil hospital na ka bynta ban leh ïa kaba donkam.
