Shillong, Nailur 03
U Lat ka Meghalaya u C.H Vijayashankar u la pynpaw ka jingsngewkmen ba ki paidbah kiba sah ha jylla Meghalaya ki long kiba donbok namar ba ki long kumba sah ha bneng namar ka jingitynnad ka mariang.
Ha kajuh ka por u la ong ba ha Meghalaya ki shynrang ynda ki la ïoh lok ki leit sah ha ïing ka kynthei katba kiwei ki jaidbynriew ki kynthei ki hap leit sah sha ïing u shynrang.
Ïa kine ki kyntien u la kren haba u la leit jngoh ïa ka Khasi Heritage Village bad ka ‘Law Kyntang kaba don ha Mawphlang ha ka Sngi Ba-ar ka 3 tarik Nailur, 2024.
Ha kane ka sngi la don lang u CEM ka KHADC, Bah Pynïaid Sing Syiem, ki MDC, ki ophisar bad u Lyngdoh ka Hima Mawphlang.
Na ka liang u Lat u la pynpaw ka jingphylla ba ha Meghalaya ym don kiba khrong kumba long lem ha kiwei ki jylla, bad kane ka pyni ïa ka jingïarap mar kylliang.
U la ban biang ba ha Meghalaya ki kynthei ki kham donbor namar ha ka jylla jong u, u shynrang u don ka bor.
U la pynpaw ka jingsngewkmen haba ka ‘law kyntang kaba la pynlong da ki spah snem mynshwa hynrei ka dang neh haduh mynta.
U CEM ka KHADC, Bah Pynïaid u la ïathuh ba ha ka jingïakynduh mynshem taïew, u la khot ïa u Lat ka jylla ban wan jngoh sha Mawphlang khnang ba un tip ïa ka jinglong kyrpang ka jaidbynriew Khasi.
U la ïathuh u la wan jngoh nyngkong ïa ka Khasi Heritage Village kaba don 8 akar ka jaka bad hangne la batai ba ka don ka jingleh prokram shisien ha ka shisnem ban pyninam ïa ki kolshor u Khasi.
Shuh shuh u la pyntip haba u Lat ka jylla u la rung sha ka ‘law kyntang jong ka Hima Mawphlang u da sngewkmen namar kane ka khlaw ka don ïa ka khana ba la sumar ïa ka naduh 700 snem mynshwa kaba la lah ban sumar haduh mynta.
U la ong ba haba rung ha kane ka ‘law kyntang ym lah ban rah eiei hynrei tang ban shu peit ïa ki dieng kiba heh kiba dang don ha kane ka khlaw.
