Shillong, Risaw 16
Ka Khasi Department, Synod College Shillong ha ryngkat ka jingïatreilang bad ka IQAC, Synod College Shillong ha ka Sngi Thohdieng ka la pynlong da ka lympung ïamir jingtip ba shisngi ha ka ktien Khasi bad phareng halor ka phang “Ka Jingstad Tynrai u Hynñiewtrep:
Kyrtiang sha ka Mynnor, Buhdor ïa ka Mynta, Pyrkhat ïa ka Lawei”.
Ïa kane ka lympung la wan ban plie bad kren kyrkhu kyrdon da u Bah Frederick Roy Kharkongor, IAS.
Ha ka jingkren, u Bah Kharkongor u la pynsngew ïa ka jingstad u Khasi ha ka ban shna ïa ki jingkieng jri, ka thaiñ jingthaiñ, ka rukom rep bad bun kiwei pat ki bynta kiba pyni ïa ka jingstad bakyrpang jong u Khasi.
Ki ‘riewshemphang kiba la wan ban ïashim bynta ki kynthup ïa u Prof. Desmond L. Kharmawphlang, Prof. Kynpham Sing Nongkynrih bad ka Dr. Solony Bareh.
Ha kane ka lympung, ki ‘riewshemphang ki la kren halor ki phang bapher-bapher kiba pynpaw ïa ka jingstad tynrai u Khasi kaba ïapher na kiwei pat ki jaidbynriew. Ha ka jingkren, ki ‘riewshemphang ki la kyntu ruh ba ki ‘riew wadbniah ba kin lum kin lang bad pynneh-pynsah ïa ka jingstad tynrai namar ba ka pynpaw ïa ka jinglong kyrpang kum ka jaidbynriew.
Ha kane ka lympung, la wan ban ïashim pule ‘Paper’ da ki nonghikai na ki kolej, sklubah bad ki ophis bapher-bapher.
Ka jingkren na ki nongpule ‘Paper’ ka la noh synñiang shibun sha ka jingtip ïa ka jingstad tynrai u hynñiewtrep.
Haba pynkut ïa ka lympung, ka Dr. Bandarilin Bairo ka la ban ba kum kine ki prokram ki long kiba donkam bha ban ïakren haduh ka kyrdan jong ka ri bad shabar-ri kumjuh.
