Shillong, Risaw 16
Ka komiti wad bniah ba la thaw da ka Sorkar halor ka projek ‘Shree Cement’ ka la sdang ban bishar bniah ïa ki jingpynsngew, ha kaba ka la pynlong ïa ka ‘Hearing’ kaba nyngkong jong ka ha Shillong ha ka Sngi Thohdieng.
U Commissioner & Secretary ka tnad kam pohïing (Political), u Bah Cyril V.D. Diengdoh uba khlieh ïa kane ka komiti u la ong ba ka komiti ka la ïoh pdiang ïa ki jingpynsngew kiba kyrshan bad kiba pyrshah ïa kane ka projek.
“Ki kyndon treikam jong ka komiti wad bniah ki don ha ka rynsan paidbah. Ki briew ki la ai jingmut – baroh ar, kiba kyrshan ïa ka projek ‘Shree Cement’ bad ki katto-katne kiba la pynpaw ïa ki jingsngewkhia. Da kaba pynshong nongrim ïa kata, ngi la leh ïa ka ‘Hearing’ mynta ka sngi,” la ong u Bah Cyril Diengdoh ha ki nongthoh khubor.
U la ong ba palat 15 tylli ki kynhun ki la wan mih hakhmat ka komiti.
“Palat 15 ne 16 tylli ki kynhun ki la wan mih. Ki briew kiba la mihkhmat ki kwah ban sngap ïa ki, kumta ngi la sngap ïa ki mynta ka sngi,” u la ong.
U Bah Cyril Diengdoh u la ong ba ïa baroh ki jingpynsngew la dep ban lum thup bad buh rekod.
“Ïa kine baroh yn sa bishar bniah. Ki don shibun ki jingpynpaw. Kano-kano ka ‘Hearing’ kaba ngi la leh mynta ka sngi, ïa kine baroh yn sa buh rekod,” u la ong.
Haba kyntait ïa ki jingkynnoh ba ka don ka jingleh shiliang, u Bah Cyril u la ong ba yn bthah ruh ïa ki ophisar ban aiti ïa ki kaiphod.
“Kam don kano-kano ka jingleh shiliang. Kane kam dei ka jingpynkut. Yn eksamin ïa baroh ki jingshisha, baroh ki kot ki sla, baroh ki kaiphod na ka Pollution Control Board, na u DC, na u SP, baroh yn eksamin bin-pa-bin,” u la ong.
U la pynshai ba katei ka ‘Hearing’ ka dei na ka bynta kito kiba la pynsngew ïa ki jingpynpaw jong ki, kynthup ïa ki nongshong shnong bad ki kynhun seng, katto-katne na ki, kiba la wan mih ban batai ïa ka jingkyrshan jong ki ïa katei ka projek.
Halor ki jingdawa ba dei ban pynlong ïa ka ‘Hearing’ ha ka jaka ba don ka projek, u la ong, “Kaei-kaei kaba ki briew ki la ong ha ka ‘Hearing’, ngi la buh jingthoh bad ngin sa leh katkum kata.”
U khlieh katei ka komiti u la ong ba ka dang kloi eh ban kren halor ka jinglong-jingman jong kane ka kam bad ba ka sien shong bishar kaba bud yn dang hap ban shim rai.
“Mynta ka sngi ngi dang shu ïoh ïa ka ‘Hearing’, kumta to ngin ïaid kawei-hadien-kawei. Ngin sa bishar bniah ïa baroh ki kot ki sla bad ki jingshisha bad katkum kata, ngin sa shim ïa ka rai,” la ong u Bah Cyril bad bynrap ba baroh kiba la shah khot sha ka ‘Hearing’ ki la wan mih hakhmat ka komiti.
