Shillong, Risaw 16
Ka Shillong Bar Association bad ka High Court of Meghalaya Bar Association ki la kynnoh ba baroh kawei ka rai halor u Advocate General u Amit Kumar ka don hapoh ka jingsynshar jong u Myntri Rangbah ka Jylla u Conrad K Sangma bad ki la khot ïa katei ka jingjia kum ka “one man’s show” ne ka jingshim rai tang marwei.
Haba pyrshah ïa ka jingkren jong u Myntri Rangbah ka Jylla dang shen ba ym lah ban weng ïa u AG tang shi miet, u Secretary ka Shillong Bar Association u Bah T.L Jyrwa u la ong kaei kaba la mih na ka jingïakynduh bad ki Myntri ka long ba dei tang u Conrad uba ïada ïa u AG.
“Kaei kaba la mih na baroh ki jingïalang kiba ngi la don ka long ba baroh ki don hapoh ka jingsynshar jong u Myntri Rangbah ka Jylla. Haba ngi ïakynduh ïa u Myntri ka tnad Aiñ, um shym la pyni ba u Amit Kumar u long uba donkam eh. Haba ngi ïakynduh ïa u Symbud Myntri Rangbah ka Jylla u Bah Prestone Tynsong, u la pyni ïa ka jingsngewkhia hynrei kim shym la ïada ïa u Amit Kumar kumba leh u CM,” la ong u Bah Jyrwa.
“Haba ngi la ïakynduh ïa u Conrad ha ka 16 tarik u Nailur, u la pynpaw ba lada ngi weng noh ïa u Amit Kumar kan don ka jingthylli ha ki kam aiñ jong ka Jylla. Kata ka pyni shai ba kane baroh ka dei ka jingpyni jong uwei u briew,” u la ong.
U Bah Jyrwa u la kdew ïa ka jingpdiang jong u Conrad shaphang ka jingïadei shimet jong u bad u AG.
“Ha ka jingïakren bad ki nongthoh khubor ba dang shen, u Conrad u la kam da ka jingshlur ba ka jingïadei jong u bad u Amit Kumar ka leit sha ka por ba u kpa jong u uba la khlad noh u dang trei shitom kum u nongsaiñ pyrthei bad ba u Amit Kumar u long kum u paralok jong ka longïing. Kumta ngi sngewthuh shano ka jinglong ba ïaineh jong u ka shong, la ka long sha ka jingmyntoi jong ka Jylla ne na ka bynta kiwei pat ki jingmyntoi,” u la ong.
Haba kynthoh ïa ka jingkren jong u Conrad ba ka jingpynkynriah kam lah ban long tang shi miet, u Bah Jyrwa u la ong ba ka Bar kam ju khmih lynti ïa kane ha ka shisngi.
“Baroh ngi sngewthuh ba ka jingpynkynriah ïa u briew na ka kam riti synshar kan ym long ka kam kaba shisngi ne shi taïew hynrei lym kumta ngi khmih lynti ïa ka jingsngewnguh kaba shisha ïa ka jingdawa jong ngi. La tyrwa ïa ka jingïakren da u Symbud Myntri Rangbah bad sa u Conrad ha ka 16 tarik u Nailur, ngi khmih lynti ïa ka jingbishar bniah kaba shisha ïa ki jingujor,” la ong u Bah Jyrwa.
U la ong ba ka jinglong khia jong ka Sorkar mynta ka don hapoh ka jingartatien.
