Shillong, Risaw 16
Ka Director jong ka tnad jngohkai ka Kong Brenda Lee Pakynteiñ, MCS shisngi shuwa ka rally jong ka Joint Action Committee pyrshah ïa ka Laban Ropeway Project, ka la ong ba ïa kane ka projek ym shym la kyntur sop-sop bad ka tnad ka la dep ïoh ïa baroh ki jingbit kiba donkam kynthup ka NOC na ki Dorbar Shnong.
Haba kren halor ka jingsngewkhia ba la pynsngew da ka JAC, ka Kong Pakynteiñ ka la ong “Ka tnad ka la ïakynduh ïa ka JAC ban pynshai ïa kiei-kiei baroh kiba ïadei bad ka projek hashuwa ka jingïakhih ba ki la pynkhreh ban pynlong ha ka sngi Saitjaiñ. La don ka jingïalang ha ka sngi Palei hapoh ka jingpynïaid ka Commissioner & Secretary Kong RM Kurbah bad la ïashimbynta da ki Ophisar na ki tnad Sorkar bapher-bapher”.
Shuh-shuh ka la ïathuh ba ha ka jingïalang, ka Commission ka la ai ki jingbatai ba bniah ha ryngkat ki stad jingtip ba ïadei ka mariang bad ba khmih ïa ka projek, kiba ïadei halor ki lad ki lynti ba la shim bad ki jingbit ba la ïoh. “Ngi la ïoh ïa ki jingbit kiba donkam kynthup ka NOC na ki Dorbar Shnong bad pyndep ïa ka jingïateh kular ban shim wai ha shuwa ban pynïaid sha khmat ïa ka projek” la ong ka Kong Pakynteiñ.
Halor ka jingong ka JAC ba ka tnad kam shym la pynlong ïa ka ‘Public Hearing’ kaba thikna, ka la ong “Ka tnad ka la thoh sha baroh ki hynñiew tylli ki Dorbar Shnong ba la kyntu ïa ki ban lum ïa ki nongshong shnong ban wan shim bynta ha ka ‘Hearing’, katkum ka rukom kaba la ju bud ban ïatreilang bad ki paidbah lyngba ki bor synshar shnong”.
Ka Kong Pakynteiñ ka la ong ba ïa ka tender la pyllait tang hadien ba ïoh NOC na ki Dorbar Shnong. Ïa ki kontraktor ba la jied la bthah ban shim ïa ki lisen ba kynthup ka Trading Licence na KHADC. “Ka Trading Licence ka dang sahteng hadien ka jingpyrshah ba la pynsngew da ka JAC. Ngi la pynlong ïa ka jingïasyllok kaba donkam bad ïoh lut ïa baroh ki jingbit kiba donkam” ka la ong.
Haba kyntait ïa ki jingkynnoh ba kam don ka jingtreikam kaba shai, ka la ong “Ngi la ju sam ïa ki jingtip halor ki sienjam ba la shim. Ka long kaba bakla ban ong ba ïa ka projek la pynïaid sop-sop, kane ka dei ka projek kaba heh na ka bynta ka Jylla”.
Ka la bynrap ba ïa ka PIL ba ïadei ka projek ruh la pynwai da ka ïingkashari ka Meghalaya High Court bad ka tnad ka la dep ïoh ïa ka Environmental Clearance na tnad jngohkai jong ka Sorkar Pdeng. “Ka tnad jngohkai ka Jylla ka la pynpaw ba ka long kaba kloi ban ïakren bad kino-kino ki kynhun ba sngewkhia ban lah pynbeit ïa kita ki jingsngewkhia kiba ïadei ka mariang bad ka jingpyrkhat ba lah ban don ka jingduna umbam umdih” ka la ong.
