Shillong, Risaw 16
Ka Khun Hynñiewtrep National Awakening Movement (KHNAM) ka la dawa na ka Khasi Hills Autonomous District Council (KHADC) ban pynduh noh ïa ki 44 tylli ki Trading Licence ha kaba la kynnoh ba ki don ki kam bym hok ba jur bha ha ka jingai Trading Licence sha ki ki briew ki bym dei ki riewlum ha ka kyrteng jong ka jingïatreilang bad ki riewlum.
Ha ka shithi sha u CEM ka KHADC Bah Winston Tony Lyngdoh, u Working President ka KHNAM Bah Thomas Passah u la ong ba ka seng ka la ïoh lyngba ka RTI ïa ki kopi jong ki 44 tylli ki laisen ba la ai sha ki briew bym dei ki riewlum kiba pynïaid ïa ki kam khaïi da ka jingïatreilang bad ki riewlum kiba dei ki trai ri trai muluk.
Haba ïadei ka jingkren jong u CEM ha ka Council hynñiew bnai mynshwa ba la ai laisen ïa uwei u Bawri na ka bynta ban pynïaid ïa ka jaka ïeng kali paidbah hadien ba u la ïatreilang bad uwei u riewlum, u Bah Thomas u la ong ba ki jubab RTI ki pynpaw ba ki don ka jingai Trading Licence.
“Kano kano ka kam khaïi kaba la pynïaid da ka jingïatreilang ka hap ban ïaid katkum ka kyndon jong ka Indian Partnership Act, 1932, Companies Act 1956, Limited Liability Partnership Act 2008. La bthah ruh ïa baroh kum kine ki kompeni ban pynrung kyrteng katkum ka aiñ bad ka kyrteng jong baroh ki ‘partner’ ka donkam ban don ha ‘register’ jong ka kompeni” u la ong.
Hynrei haba wad ïa ki kopi ba la pynskhem jong ki kot pynshisha jong kine ki kompeni, u Bah Thomas u la ong ba ka jubab jong ka Council ka pyni ba ym don uwei ruh uba don ïa ki kot pynshisha kumba la bthah da ka aiñ.
“Kaba mut ba kim dei ki kompeni ba ïatreilang katkum ka kyndon jong ki aiñ ba la kdew haneng. Haba bishar bniah ïa kine ki Trading Licence, la lap ba ka jingmyntoi jong u riewlum shimet ka long kaba duna bha, kaba pynlong ïa ngi ban ngeit ba ïa u paralok riewlum la shu pyndonkam tang ban ïoh ïa ka Trading Licence” u la ong.
Shuh-shuh u la pynpaw ba ki kompeni ki la ai tang ïa ka Affidavit jong ka jingkular hapdeng ki riewlum bad ki bym dei ki riewlum, katba ïa ka kyrteng jong u riewlum ym shym la pynrung kyrteng kum u paralok ba ïatreilang lane Partnership.
Napdeng ki Licence ba la buh kyrteng ki long ka Green Clift Resort, Jendrina Hospitality LLP, Megha Automotive LLP, Sani Steels Pvt Ltd, Premier Mega Hub, Jubilant Food Works Ltd (Domino’s Pizza), Dream House Luxury Living LLP, Sati Resort, HPT Orchid Resort, Meghalaya Brewing Company, Meghalaya Polymers bad kiwei-kiwei.
Da kaba khot ïa katei ka jingpynbeit kum ka Benami, ka KHNAM ka la ong, “Baroh ki laisen ba la ai da ka Council na ka bynta ka kam khaïi pateng kaba la pynïaid da ka jingïatreilang hapdeng ki bym dei ki riewlum bad u riewlum ha ka jingshisha ka dei ka kam kaba la pynïaid ha ka Benami kaba long pyrshah ïa ka Benami Transactions Prohibition Act, 1985 bad kaba lah ban pynshitom katkum ka kyndon 3 jong ka Act”.
Ka seng ka la kyntu ïa ka Council ba ka dei ban leh eiei mardor haba ïadei bad kane, “Da kaba pynshong nongrim ïa ki jingshisha ba la kdew haneng ngin kyntu ïa ka Council ban pynduh noh ïa kine ki laisen baroh bad ban kiar na kum kine ki rukom treikam ki ban long tang ka lad ïa ki bym dei ki riewlum ban shim ïa ka kam khaïi hapoh ka Jylla. Lada ka Council kam leh ïa kaba donkam ban pynbeit, kan pynbor ïa ngi ban ujor sha ki bor ba kham halor kumba la bthah da ka 4(a) jong ka aiñ” la ong u Bah Thomas.
