Shillong, Risaw 16
Shi bnai tam hadien ba ka Hynñiewtrep Youths Council (HYC), ka la ujor da ka ejahar ha u Bah Vivek Syiem, SP ka East Khasi Hills District pyrshah ïa ar ngut ki briew na Assam, kiba kren be-ijot ïa ki longkmie bad kynthei Khasi lyngba ki rynsan social media, na ka liang ki pulit ka Sardar Police Station, ha ka 16 tarik Risaw 2026, ka la khot ïa ka HYC ban ai ïa ki sakhi sabut.
Haba kren sha ki lad pathai khubor, u Bah Enlang Sawïan, Education Secretary, u la ai ka jingïaroh ïa ki pulit namar ba ki la dep ban register mukotduma bad ban pynngat ïa kine ki ar ngut ki briew ha hynñiew tylli ki kyndon jong ka BNS.
U Bah Enlang u la ong ba na ka liang ki pulit kin sa shimkhia halor kane ka kam bad ban phah ïa kitei ki ar ngut ki briew ban wan mih sha Police Station.
Ha ka juh ka por, u la pynpaw ba ka long kaba sngewsih ban ïohi ba ka shimpor haduh shi bnai tam ei-ei ïa ki pulit, ban leh ïa kane ka kam kaba pyni ba ka don ka jingdkoh ha ka rukom treikam.
“Ngi sngewbynniaw haduh katta-katta, ïa ka jingpynslem ka tnad pulit ban shim kam mardor halor kane ka mat. Ka don beit ka jingdkoh treikam kaba ka seng kam shym lap, namar baroh ki jingujor pyrshah ïa ki bar jylla, kam ju don ka jingpynsaja ne ban shimkhia ka tnad pulit,” la ong u Bah Enlang.
Namarkata, u la bynrap ba ka seng ka ngeit skhem ba ka tnad pulit kan sa shimkhia mardor halor kane ka kam.
