Shillong, Nailur 03
Hadien ka jingshah kynnoh ba ka NPP ka la pyndonkam da ka pisa bym hok ban thied ïa ki MLA ka Congress ban pynpoi sha ka NPP, u Myntri Sorkar u Bah Kyrmen Shylla u la ong ba lada don kino-kino na ki nongmihkhmat kiba donkti ban leh kano-kano ka kam ka bym ïahap dei ban beh syndon ïa ki na ka kyrdan ba ki don wat ban weng na ka Jylla.
U la ong ba ym lah ban ong kano kaba dei kano kaba lait hynrei ban donkti ha kano-kano ka kam beaiñ kam long satia kaba dei.
U la ong ba kito kiba kynnoh ruh ki dei ban don ka sakhi namar ban shu kynthoh khlem nongrim kam long satia kaba dei khamtam kum ïa u drok uba ktah ïa ka imlang sahlang.
U Bah Kyrmen Shylla u la kren ïa kane halor ka jingkynnoh jong u President ka Congress u Bah Vincent H Pala uba la kynnoh ba ka NPP ka pyndonkam da ka pisa bym hok kynthup na u drok ban thied ïa ki MLA ban pynïasoh sha ka NPP.
U la ong ba ka jingkynnoh ka long kaba khia bad kito kiba kynnoh lehse ki don ki sabut hynrei kam long kaba dei ban shu kren bad kynnoh khlem nongrim.
U la ong ruh ba lada uno-uno u MLA u kynnoh pyrshah ïa uwei pat u MLA, dei ban don ka jingpynshisha ban pynskhem ïa ki jingkynnoh.
“Lada ki dei ki nongmihkhmat ne ‘riew paidbah, kito kiba kynnoh ki dei ban don ka sakhi ban pynshisha ïa ka jingkynnoh,” u la ong.
