Shillong, Nailur 03
U President ka Bhara-tiya Janata Party (BJP), Meghalaya, u Rikman G, Momin u la ong ba ka seng ka la ïaid shakhmat bad ki jingpynkhreh haba ïadei bad ka ilekshon shiteng samoi ha Gambegre bad kyrmen skhem ban poi sha ka thong ha kane ka kynti ban wan.
“Ngi la sdang, ha ka jingshisha ha Gambegre, ngi don 51 tylli ki ‘Polling Station’ bad na kine, ngi la pyndep ïa ki kam ha ki ‘Booth Level’ na bynta 48 tylli ki ‘Polling Station’,” la ong u Momin haba kren sha ki lad pathai khubor ha ka Sngi Ba-ar.
Haba kdew ba ka seng ka la ïaid shakhmat bad ki jingpynkhreh, u la ong, “Ki paidbah ruh ki jubab bha bad wat u State Vice-President, u Bernard N. Marak u trei shitom miet bad sngi ban pynsngew sha ki paidbah kaei kaba ka Sorkar Pdeng ka la ai sha ngi…ki jingbym biang ha ka skhim JJM, kumta u pyrshang. Wat ha ki jaka bym treikam ka PMGSY, ka kam ka la sdang – kaba la sahkut da ki snem…kumta u la trei bad ngi ïoh ka jubab kaba biang na ki paidbah.”
Na ka liang u President u la ong ba haduh mynta, ka seng kam pat khot aplikeshon ïa ki kyrtong hynrei ka dang pyntyllun ïa ki kam jong ka seng.
Haba kylli katno ka seng ka sngew skhem ha kane ka ilekshon shiteng samoi ban wan, u la ong, “Hooid ngi don jingkyrmen skhem ha kane ka ilekshon shiteng samoi.”
U Momin u la ïathuh ruh ba haduh mynta ym pat ïoh kano-kano ka jingbthah na ka Sorkar Pdeng ban ïaid shakhmat bad ka ilekshon hynrei baroh ki jingdonkam ba ïadei bad ka pynbit-pynbiang ïa ka seng kumjuh ba ïadei bad ka ilekshon, la jan dep lut baroh.
Kum ban shu kdew hangne, ka konstitwensi Gambegre ka la sah thylli namar ka jingieh noh kam jong u MLA ka Congress, u Saleng A. Sangma ha ka 10 tarik Jylliew mynta u snem hadien ba u la shah jied kum u MP ka Tura Parliamentary konstitwensi ha ka ilekshon ba la dep sha ka Lok Sabha.
Hynrei kumba ka long, ka Election Commission of India (ECI) kam pat pynbna ïa ka tarik na bynta ban pynlong ïa ka ilekshon shiteng samoi jong ka Gambegre.
Ïa kane ka ilekshon shiteng samoi hap ban pynlong hapoh 6 bnai bad kumta ka lah ban long ha kano-kano ka por mynta u snem.
