Shillong, Nailur 03
Ka Myntri ba khmih ïa ka tnat ka Koit ka Khiah ka Jylla ka Kong Ampareen Lyngdoh kaba la don mynta ha Japan, ha ka Lah Sngi U Blei ka la leit ban jngoh bad ïakynduh ïa ki samla ka Jylla ba trei nos ha Japan.
Kane ka jingleit jngoh ka Myntri ïa ki lai ngut ki nos kiba tip kyrteng kum ka samla Shisha Lapyntngen Lartang, Launda B Sangma bad Banñiewkor Mukhim kiba trei ha Tsurumaki Onsen Hospital, ka long ban buddien ïa ka jinglong-jingman jong ki hadien ba ki la jied ban leit trei ha kane ka Ri. Kine ki dei kiba la ïoh kam lyngba ka jingtrei shitom ka Sorkar Jylla bad ka Navic Corporation.
Nalor ka jingïoh ban ïakynduh bad ruh ban ïakren bad syllok bad kine ki samla ba trei nos, ka Myntri ka la ïoh ruh ban ïakynduh ïa u Director jong ka Institute. Ha kane ka jingleit sha Japan, ïa ka Myntri la synran lang da u Ram Kumar uba dei u Secretary ka tnat ka koit ka khiah.
Ha kane kajuh ka sngi, ka Myntri ka la leit ban ïuhkjat ha ALIVE Elderly Care Centre bad ïakynduh ïa ki bor pynïaid ban twad jingmut halor ka jingshakri jong ki nos ka Jylla. Ka Myntri ka la pyntip ruh ba na ka liang u President kane ka jaka sumar u la pynpaw ban thung kam biang sa 10 ngut ki nos na Meghalaya.
Halor kane, ka Myntri ka la pyntip ba kan sa don biang ka Job Fair ka ban long ha ka 17 tarik mynta u bnai ha Convention Centre na ka bynta kane ka jingthung kam.
Shuh shuh na ka liang jong ka Myntri ka la pyntip ba ha ka 5 tarik Nailur, kan leit sa sha Kurihara-Shi Miyagi Perfectore na ka bynta ban leit jngoh ïa ka Mizudori Farm jong ka Yats Corporation Pvt Ltd ban lum jingtip bad jinghikai halor ka kam rep tit shitake.
Kane ka jingleit jngoh ka dei hadien ka jingïasoi Memorandum of Understanding (MoU) hapdeng ka Yats Corporation Pvt Ltd bad ka tnat ka rep ka riang bad ka Hill Farmers Union (HPU) ha u snem 2019 na ka bynta ban rep ïa u tit shitake ka Japan ha Meghalaya.