Shillong, Nailur 04
Ka Sorkar Jylla ka la thaw lad mynta ban ïoh shna noh da ka jingkieng ïaid kali heh kaba shipor sharum na ka dam Umïam khnang ban ïaid ki kali kit mar kynthup ki bos kiba ju wan na kiwei pat ki Jylla sha Meghalaya namar kumba ka long mynta, ki kali heh kim ïoh ban ïaid lyngba ka jingkieng ha dam Umïam.
Haba ïakren bad u Symbud Myntri Rangbah u Bah Prestone Tynsong uba peit ïa ka tnat shna surok (PWD Roads) u la ong ba u la dep bthah ïa ki karikor (engineer) ban thaw lad ki lynti lada long kaba lah ban shna noh da ka jingkieng shipor (bailey bridge) ban ïoh ïaid ki kali heh kiba kit jingkit kynthup ki bos kiba heh kiba hap ban shu ïeng mynta harud ka pung Umïam namar kim lah ban ïaid lyngba ka jingkieng ha dam Umïam.
“Lada ngi lah la kumno-kumno ban pyndep hapoh 6 bnai ïa ka jingkieng kaba shipor kan long ka jingïarap shikatdei eh,” la ong u Bah Prestone uba la pyntip ruh ba ka National Highway Infrastructure Development Corporation Limited (NHIDCL) mynta ka dang sorjamin ïa ki jaka ban shna da kawei pat ka surok bad jingkieng kham sharum bad kham jngai na ka jingkieng ha dam Umïam khnang ba ynda la ïoh da kawei pat ka surok ki kali kin nym ïaid shuh lyngba ka dam Umïam.
Ka NHIDCL ka la shimti ïa ka surokbah naduh Lad Umroi sha Shillong bad ka dei ka kamram jong ka ban peit ïa ka jingdonkam ban shna da kawei pat ka surok kaba ïaid lait ïa ka dam Umïam.
