Shillong, Nailur 04
Ki Muktiar jong u Symbud Myntri Rangbah ka jylla, u Bah Sniawbhalang Dhar ha ka 4 tatik Nailur 2024 ki la phah da ka shithi ne ka ‘legal notice’ sha u MP barim bad President ka Meghalaya Pradesh Congress Committee u Bah Vincent H Pala ha kaba ki la dawa ba u dei ban siew T.100 klur bad ban panmap khlem buh kyndon halor ki jingkynthoh pyrshah ïa u Bah Sniawbhalang.
Katkum kane ka shithi ba la phah da ka Sharan and Associates LLP na Delhi, kaba dei ka kynhun ki muktiar ba mihkhmat na ka bynta u Bah Sniawbhalang, la ong ba ki jingkynthoh u Bah Pala pyrshah ïa u Symbud Myntri Rangbah lyngba ki lad pathai khubor ha ka 22 tarik Nailar 2024 ki long ki bym don jingshisha, kiba bakla, kiba khlem nongrim, bad kiba la kren tang namar ki kam saiñ pyrthei.
Ki la pynkynmaw ba u Bah Pala u la kynnoh ba u Bah Sniawbhalang u dei u nongaiktien jong ka seng BJP bad ka kynhun RSS. U la kynnoh ruh ba ka BJP ka don jingtip halor ki kam beaiñ ba la leh da u Bah Sniawbhalang bad ka kynhun jong u naduh u drok haduh u dewïong bad kiwei.
Shuh shuh ki la ong ba kitei ki jingkynnoh ki long tang ban pynthohbria ïa u Bah Sniawbhalang hakhmat ki paidbah. Nalorkata la ong ruh ba hadien ka jingmih jong kitei ki jingkynnoh lamler ka la don ka jingktah kaba jur ïa u Bah Sniawbhalang.
Namarkata, la dawa ba u Bah Pala u dei ban ai da ka jingthoh ban weng noh ïa kitei ki jingkynnoh bad ha kajuh ka por ban panmap lyngba ki lad pathai khubor, ban ai da ka jingthoh ba nangne shakhmat um mlien shuh ban pynmih ïa kiba kum kitei ki jingkynnoh bad jingkynthoh, ban siew T.100 klur kum ka bai mynraiñ khmat bad ban siew sha u Bah Sniawbhalang na ka bynta ka jingduh ka jong u na ka daw jong kitei ki jingkynnoh bad jingkynthoh.
Ha kajuh ka por la ai por ïa u Bah Pala ba un bthah ïa ki rynsan social media baroh ba ki dei ban weng noh ïa kitei ki jingkynnoh bad jingkynthoh jong u.
Lada u Bah Pala um bud kumba la bthah katkum ba la batai bad kiwei kiwei, kitei ki muktiar ki la ong ba kin sa ïaid da kawei pat ka lynti ban ujor mukotduma kynthup ban ujor halor ka bai mynrain khmat katkum ki kyndon 351 bad 356 jong ka BNS Act, 2023.
