Shillong, Nailur 04
Ka jingdheng kali ha nongbah Shillong kam dei shuh kaba thymmai hynrei kaba long manla ka sngi kat shaba phai khamtam lei ha ki bynta ka surok naduh Khyndai Lad shaduh Motphran.
Kane ka la pynsohsat shi kat dei eh ïa ki nongleit nongwan kiba ïaleh ban beh por sha ki kam.
Ka jingkylli kaba mih mynta ka long hato ka dei namar ka jingrit jong ki surok ne ka jingïatynruh palat ban poi nyngkong sha ki jaka ba kum ki nongñiah ki thmu ban poi. Ïa kane ka rukom tynruh la lah ban sakhi biang ha ka janmiet ka sngi Balang ha ka thaiñ Them Bijoy, ha kaba ym ithuh ithaw shuh ïa ki kali bad khamtam ki ar shaka, shano ki mut ïaid bad shano ki mut khun.
Katkum ka jingïoh ban sakhi ïa ka jingdheng kali ha kane ka bynta, la paw ba ka dei na ka jingtynruh palat jong ki ar shaka, kiba la shu tam uwei ïa uwei bad kam don shuh ka jingïaid ryntih hynrei tang lait jaka khyndiat la ïapynsted ban tur, ym tip shuh haduh katno kata ka jingkyrkieh ka jong ki.
Na ka liang jong ki katto katne ngut ki ‘riew paidbah kiba ïaid lynti na kane ka bynta, ki la pynpaw ka jingsngewdiaw ïa ka jingkhapngiah, ha kaba wat ïa ka ïaid ka ïeng da ki kjat ruh ka la pynsohsat shi katdei eh. Ki la buh jingkylli ruh ba shano ki pulit pynïaid kali kiba dei ban peit bad pynïaid ha ka rukom kaba dei ym tang ba kan pynsuk hynrei kan pynlait ruh na kum kine ki jingeh kaba ki mad ha ka leit ka wan.
