Tura, Nailur:
U MDC ka GHADC ba peit ïa ka tnad Forest & Environment, u Ashahel D. Shira, ha ka Lah Sngi U Blei u la kyrpad ïa ki nongtrei ba ïakhih jong ka GHADC ban wanphai sha ka kam da kaba ong ba ka jingïapynbeit kaba biang tara ka ban ïada ïa ki nongtrei bad ka Council yn sa ïoh lyngba ka jingïakren bad ka jingïatreilang.
U la kular ha ka kyrwoh ba ki bor pynïaid ka GHADC ki long kiba kloi ban shimkhia ïa ki jingeh ha ka liang ka pisa kaba ka Council ka mad bad ban pyntikna ïa ki jingshakri kiba ïaid beit na bynta ki paidbah ka Ri-lum Garo. Katkum ka jingong jong u, la shim ïa ki sienjam ban pynbha ïa ka pla tyngka jong ka Council bad ka jingshakri.
“Ngi la don ha ka jingïakren bad ka Sorkar Jylla bad ka Sorkar Pdeng ba kynthup ïa ki jingïamir jingmut bad ki Myntri ba dei khmih. Kum shi bynta jong ki jingminot jong ngi, la phah ïa ka shithi ha ka 22 tarik Lber, 2024, sha u Secretary ka Sorkar India, ka tnad kam pohïing, da u Dr. Vijay Kumar D., IAS, Commissioner & Secretary, ka Sorkar Jylla. Kane ka kyrwoh – GHADC-GAD/DOL/S90/2016/573 bad GHADC-GAD/DOL/590/2016/574, ha kaba sdang ha ka 11 tarik Lber, 2024, ka kyrpad ïa ka jingkyrshan pisa kaba T.252 klur ban shimkhia ïa ka jingsiew tulop na bynta ki nongtrei GHADC. Kine ki jingïakren ki la ïaid shakhmat bad ngi kyrmen ba kin seisoh bad pynmyntoi ïa ka Council bad ki nongtrei,” u la ong.
“Wat hapdeng ka jingeh ha ka liang ka pisa, ka Executive Committee ba mynta ka bud ryntih ïa ki jingbthah na ka ïingbishar ka Meghalaya, khamtam ka hukum ha ka mukotduma WP(C) No. 19 jong u snem 2016. Ngi la pyntikna ïa ka jingsiew kaba biang por sha ki nongtrei (non-gazetted). Ka thong ba hakhmat eh jong ngi ka long ban pynneh ïa ki jingshakri paidbah ba donkam bad pynduna ïa ki jingpynthut sha ki nongshong shnong ka Ri-lum Garo,” u la bynrap
Shuh shuh u Shira u la ong ba watla ki jingdawa ba la pynthymmai na bynta ka jingsiew kaba mardor hapoh jong ka ‘Fifth Pay Commission’, ha ryngkat ka jingbeit ryntih bad ka jingïateh na ka liang ki Executive Member barim khlem ka jingkhmih bniah ïa ka jinglong-jingman ka pla tyngka ka Council, ka jingïakhih ha kawei ka liang ka la ktah ïa ka jingtreikam jong ka Council bad ka jinglah jong ka ban pynmih khajna.
“Da kaba burom, ngi kyrpad ïa baroh ki nongtrei ban pyrkhat ïa ka jingktah kaba ïar jong ka jingïakhih bad wanphai sha ka kam na bynta ka bha ka miat jong ka GHADC bad ki paidbah ba ka shakri. Ngi kyrmen skhem ba lyngba ka jingbteng ka jingïakren bad ka jingïatreilang, ngi lah ban ïoh ïa ka jingpynbeit kaba biang tara ka ban ïada ïa ki nongtrei bad ka jingïaineh jong ka jingbiang pisa ka Council,” u la kyrpad.
