Nongstoiñ, Nailur:
U Deputy Commissioner (DC) jong ka West Khasi Hills District, Bah Garod LSN Dykes, u la pyntip bad pynbna sha ki nongshong shnong jong ka West Khasi Hills ba ka Sorkar India ka la dep ban pyntreikam bad pyllait ïa ka NAMASTE Scheme da ka jingthmu ban pynthikna ïa ka jingshngaiñ bad ka burom jong ki nongtrei ha ki jaka pyntuid jaboh, ki jaka lum jakhlia bad ki nonglum jaboh.
U DC u la ong ruh ba hapoh kane ka skhim la don ruh ki kyndon kiba la buh ryntih kiba kynhup ïa ka jingpynpaw ïa ki nonglum jaboh bad ka jingpynbiang ïa ki ID Card, ka jinghikai halor ka jingshngaiñ ha ka kam halor ki jingma ha ka kam bad ka jingpynïaid kaba shngaiñ, ki jingpynbiang ïa ki tiar PPE kiba ïadei bad ka aiom bad katkum ka jingdonkam.
Shuh shuh ka jingpynbiang ïa ka koit ka khiah hapoh u Ayushman Bharat-PMJAY, ka jingïarap pisa na ka bynta ka kali lum jaboh IOJ 5 tylli ki jaka lum jaboh.
Na ka bynta ban ïoh jingmyntoi lyngba kane ka skhim, la kyntu ïa baroh ki nonglum jaboh jabaiñ hapoh ka district ba kin wan mih hakhmat ki nongkheiñ ba la aiti ha kawei pa kawei ka shnong bad lah ruh ban rejistar ha ki ophis jong u BDO ka Nongstoiñ bad Mawshynrut, kumjuh ruh kum ka ophis jong ka komiti shnong Nongstoiñ, ophis u Deputy Commissioner, West Khasi Hills District ha lane shuwa ka 12/09/2024 ha ki kynta treikam, ryngkat kine ki kot donkam kaba kyntup ïa ka phorm kaba batai bniah shaphang ïalade, ar tylli ki dur passport, ki kot jingtip shaphnag ki bank jong ki, EPIC/Aadhaar Card bad ki kot pynshisha ïa ka jaka sah jong ki.
Ha kajuh ka por u DC ka West Khasi Hills u la pyntip paidbah ba ka Sorkar India ka la dep ban pyntreikam ïa ka aiñ kaba la tip kum ka ‘Prohibition of Employment as Scavengers and their Rehabilitation Act 2013’ kaba la dep ban pyntreikam naduh 19 tarik u Nailur, 2013 bad hapoh kane ka aiñ ka khang pyrshah ban pynïaid pathar ïa ki jaboh briew na ki septic tank sha ki nala, ne ki thliew, ne ki lynti ki syngkien bad kiwei kiwei, la ka dei da ki riew shimet, ki bor synshar shnong, bad ki kontraktor bad ka dei ka hok bad ka jingkitkhlieh jong uwei pa uwei u briew ban leh khuid leh suba.
Kumta la kyntu ïa baroh ban burom bad bud ryntih ïa kitei ki kyndon jong kane ka aiñ.
