Shillong, Nailur 04
Ha ka 4 tarik u Nailur 2024, la lap ïa uwei u shipai Border Security Force (BSF) uba la thiah lyngktar ha kawei ka sem kaba don ha ka jaka ïaid-kai pyngngad ha madan Golflink ha ka jingbym tip briew shuh namar ka jingbuaid shaba palat.Na ka liang ki bor pahara kiba don ha katei ka jaka ki la ïathuh ba kitei ki shipai BSF ki la don 2 ngut ha kaba ki la rung shapoh ka madan Golflink naduh ka por 7 baje mynstep bad ka dei haduh ka por 12 baje shiteng sngi ba uwei napdeng kine ki shipai, u la thiah lyngktar ha madan jong katei ka sem.
Katkum ki tyllong khubor la ong ba la suba jur ba utei u shipai BSF u la dih palat pud ïa ki jingdih pynbuaid kaba la pynlong ïa u haduh u pud ba um lah shuh wat tang ban shong ne ïeng hynrei u la hap ban shu thiah ha madan.
Na ka liang ki pulit ka Pasteur Beat House hadien ka jingïoh jingtip halor kane ka jingjia, ki la wan poi mar-mar ha katei ka jaka ban kit noh ïa utei u shipai BSF na katei ka jaka bad ban ïalam ïa u ban leh ïa ka ‘medical check-up’.
