Nongpoh, Nailur 04
U Dr Ricky AJ Syngkon, MP jong ka Shillong ha ka Sngi Balang u la leit hiar jurip hi dalade ryngkat bad ki bor pynïaid district ka Ri Bhoi, ki ophisar na ka tnat Water Resources bad ruh na ka NHIDCL halor ka jingmih ka jingpyrshah jong ki katto katne ki paidbah nongshong shnong ka Umroi Madan ïa ka jingthmu ban pynïaid lyngba ïa ka surok 4-lane lyngba ki ranab lum jong ka shnong halor ka jingtieng ïoh duh ki tyllong umbam umdih kaba don ha katei ka jaka.
Ha kane ka sngi, la sakhi ruh ïa ka jingïadon ryngkat ki nongïalam shnong ka Umroi Madan bad ruh kito ki paidbah kiba pyrshah kiba la ïa sei ïa la ki jong ki nia ki jutang hakhmat u MP ka Shillong bad ki ophisar halor ka jingkyrshan bad ka jingpyrshah ka jong ki ïa katei ka jingthmu ban shna ïa ka surokbah 4-lane ka ban pynïasoh naduh na Lad Umroi ter ter shaduh sha Malidor.
Ki nongïalam shnong ha kane ka sngi, ki la pynpaw ba na ka liang ka jong ki, kim don bynta satia ha kata ka jingpynïaid ïa ka surok 4-lane lyngba ka ranab lum, ha kaba la kubur ruh da ki ophisar kiba jurip ba ki nongïalam shnong kim don bynta eiei. Kitei ki nongïalam shnong, ki la pynshai ruh ba na ka liang ka jong ki, lada katei ka surok thymmai kan wan na ka surok ba rim ne ba thymmai ruh, kim don satia ka jingpyrshah, hynrei ka tyllong umbam umdih jong ka shnong kam dei satia ban shah ktah bad ïa kane ki la dep ruh ban ai da ka jingthoh sha u DC ka Ri Bhoi ha u snem uba la dep.
Na ka liang jong katto-katne ki paidbah nongshong shnong kiba pyrshah, ki la pynpaw ïa ka jingsngewkhia ba katei ka jingshna ïa ka surok lyngba katei ka lain kaba thymmai kaba ngat lyngba ki ranab lum, kan ktah ïa ka tyllong umbam umdih bad kane kan wanrah jingeh ïa ki lashai lashisngi naba kim don shuh da kawei pat ka tyllong um. Nalorkata, ki la pynpaw ruh ba ka surok lyngba katei ka ranab lum kan lah ruh ban wanrah ïa ka jingtwa khyndew bad ka jingjulor ruh ïa ki ïing ki sem kiba don sha trai jong u lum, kaba lah ban rah ïa ka jingjia ba sngewsih bad ka jingduhnong ïa ki paidbah nongshong shnong.
Ki ophisar ka tnat Water Resource haba pynshai ïa ka jingwad jingtip jong ki paidbah la katei ka jingwan jong ka surok kan ktah ne em ïa ka tyllong umbam umdih ka jongki, ki ophisar ki la pynpaw lada duna eh ruh, kan shimpor haduh shisnem kynthih ba kin wad bniah halor katei ka bynta halor ka jingheh bad ka jingrit jong katei ka tyllong um bad ruh ban wanrah ïa ki ‘riew shemphang kiban wad bniah ïa ka um bad ka khyndew kaba don ha katei ka tyllong um jong ka shnong Umroi Madan.
Halor kane, na ka liang jong u Dr Ricky AJ Syngkon, u la pynpaw ba ka jingleit jngoh ka jong u, ka dei ban ïohi hi da la ki jong ki khmat halor kitei ki jingeh kiba la pynpaw da ki nongshong shnong bad kyntu ruh ïa ki bor pynïaid jong ka NHIDCL ba kin da bishar bniah bin-pa-bin ha shwa ba kin shna ïa katei ka surok lyngba ki ranab lum, khnang ba kan nym don kano-kano ka jingktah ïa ka tyllong um jong ka shnong bad ki jingdon jingem ki jong ki.
