Sohra, Nailur:
Ka shong mynta ha ki bor ka Karuna Trust kaba pynïaid ïa ka Mawlong PHC lyngba ka PPP Mode jong ka National Health Mission lem ka tnat ka koit ka khiah ka Sorkar Meghalaya ban shim ïa ka rai la kan pynneh ne pynkynriah noh ïa ka Dr R Siangshai hadien lai snem ba ka la trei ïa ka kam kum ka Medical Officer Incharge ka PHC.
Kane ka la mih na ki bor pynïaid ka Elaka Mawlong ha ka jingïalam u Bah SK Laloo, Sirdar ryngkat ki nongïalam ka HNYF South East Khasi Hills District bad Mawlong Unit hadien ka jingïalang ïamir jingmut bad ki ophisar ka tnat ka koit ka khiah na East Khasi Hills District, ki doktor bad nongtrei ka PHC, BDO Shella Bholaganj C&RD Block, ki bor ka Karuna Trust bad kiwei ba la pynlong ha ka 2 tarik u Nailur, 2024.
Ka jinglum jingïalang ka la long hadien ba la mih ka jingkynnoh na ka HNYF bad ki nongshong shnong ka thaiñ Mawlong ha ka 26 tarik Nailar, 2024 kiba la kynnoh ba ka Dr R Siangshai ka leh baheh, kam shimkhia ïa ka kam nalor ba kam ai jingïatreilang bad ki paidbah.
Ha kane ka jingïalang, ka Elaka Mawlong ryngkat ka HNYF ki la pynpaw ba ki kwah ban ïoh doktor da kiba la pass kyrdan MBBS ha ka PHC bad ki ieh pat ha ka jingibit ka Karuna Trust ban weng lane pynneh ïa ka Dr R Siangshai. Ha kajuh ka por ki la pynpaw ruh ba ki dang kwah ba ka Karuna Trust kan pynïaid ïa ka PHC wat la ka la don ka jingtyrwa ban pynïaid noh da ka tnat ka koit ka khiah.
Hynrei ha kane ka sngi haba kren sha ki lad pathai khubor, u Sirdar ryngkat ki nongïalam HNYF ki la ong ba ki kwah ban ïoh doktor da kiba la pass kyrdan MBBS ha ka PHC bad ki ieh pat ha ka jingibit ka Karuna Trust ban weng lane pynneh ïa ka Dr R Siangshai.
Haba pynpaw ba ïa baroh ki jingkynnoh bad jingbym ïasngewthuh jingmut la dep kren pynbeit, u Bah S.K Laloo u la ong, ka Elaka ka dang kwah ba ka Karuna Trust kan pynïaid ïa ka PHC wat la ka la don ka jingtyrwa ban pynïaid noh da ka tnat ka koit ka khiah.
U la ong ruh ba u khmih lynti ka jingïatreilang bad ka PHC nangne shakhmat bad kiei-kiei kiba la dep jia hap ban ïa map bad klet noh.
Ka Dr E.L Kharmutee, District Maternal and Child Health Officer ka la ong ba kam long kaba suk ïa ki doktor ban leit sumar pang sha ki ïing. Halor ka jingshim pisa da ki kali kit nongpang (Ambulance) hi ka dei ïa kiba la rangbah ym ïa ki longkmie armet bad ki khyllung ba hapoh shi snem.
Ka Dr Siangshai ka dei kaba trei shitom bad 3 snem ka la trei ha kane ka PHC, bad ym ju don ki jingujor lait tang ba duna ki dawai. Kumta ïa ki jingpharep dei ban da bishar bha bad donkam ka jingïakren sngewthuh, la ong ka Dr Kharmutee.
U Bah Banjop Khongwir, Nongaiktien ka HNYF South East Khasi Hills District u la ong, ka seng ka la ïoh ka jingujor na ki paidbah bad kumta ka jingïakren ka long na ka bynta ka jingmyntoi jong ki paidbah da ka jingïatreilang.
Da kaba pynpaw ka jingsngewsih ba na ka khubor kaba la pynmih ha ki khyndiat sngi ba la dep ki don ki briew kiba kynthoh pynïasyriem ïa ka jingjia ha Kolkata, u Bah Banjop u la kyntu ïa ki paidbah ban kiar na kaba kynthoh kulmar namar ka ktah ïa ka jingsngew.
“Ki lah ban don ki jingbakla na ka liang ki paidbah ne ka doktor ruh kumjuh hynrei hap ban pynbeit da ka jingïatreilang,” u la ong da kaba bynrap ba halor ka jingshim pisa bai umphniang Ambulance hap peit ka jingdonkam. U la ong, ban teh kyndon eh ha ka koit ka khiah ïa ki paidbah ruh ka ktah bad ban shim kabu ïa ki nongtrei ruh kam long kaba ïahap.
U la ong ba ka seng kan sa ïakren bad u MLA ka Shella, u Bah Balajiedkupar Synrem ban pynbiang ïa ka jingshakri ha ka ban sumar ïa ki nongshong shnong ha ki PHC bad ki Sub-Centre bapher bapher. U la ong ba ka seng kan ïakren ruh bad ka Myntri ka tnat ka Koit ka khiah, ka Kong Ampareen Lyngdoh ha ki khyndiat sngi ban wan hadien ka jingïakren bad u MLA.
