Shillong, Nailur 04
U Samla Steve Jyrwa uba dei na ka shnong Nongmensong, uba la leit ruh ban ïashim bynta ha ka lympung ïakob shad kaba heh hapoh ka Ri, kaba la tip kum ka India Best Dancers Season 4, mynta u la poi bad ïoh rung ha ka Top 6 jong kane ka jingïakob.
Halor kane, ki bahaïing u Samla Steve Jyrwa ha ryngkat ka jingsynran lang ka All Meghalaya Dancers Association (AMDA) ha ka 4 tarik u Nailur 2024 ha ka jingïakynduh bad ki lad pathai khubor ha Shillong Press Club, ki la pan ka jingkyrshan na ki paidbah na ka bynta ban ai ïa ka ‘vote’ ka jong ki sha u samla Steve Jyrwa uba la poi shaduh ka kyrdan Top 6 ha ka India Best Dancers kaba la pynlong ha nongbah Mumbai.
Ki bahaïing ki la pan ka jingkyrshan na ki paidbah ba kin sngewbha ban ïarap ïa u khun jong ki, da kaba kyrshan ban ‘vote’ ïa u lyngba ka app Sony Live khnang ba un poi sha ka thong ban wanrah nam bad burom ïa ka jylla hi baroh kawei. U samla Steve Jyrwa u la leit ban ïashim bynta ha ka rynsan ïakob shad kaba la sdang ha u Naitung bad mynta u donkam sa ka jingkyrshan na ki paidbah ban poi sha ka phainal jong katei ka jingïakob. U samla Steve un sa mih rynsan biang ha ka Sngi Saitjaiñ bad Sngi U Blei mynta ka taïew ha ka por 8 baje janmiet.
Haba ai jingkren, na ka liang ka Kong Bibi Jyrwa kaba dei ka kmie jong u Samla Steve Jyrwa, ka la ïathuh ba naduh ba sdang ka la kyrshan hi dalade ïa u ban leit ïashim bynta haduh mynta. Kumta mynta haba la dei sa ka pali jong ki paidbah ban plie ka lad ba un nangkiew, ka la pan ka jingkyrshan ba kin ïarap lyngba ka ‘vote’ ka jong ki.
