Shillong, Nailur:
Kum ka dak ban ai mynsiem bad ka jingai khublei ïa ka samla Angelia N Marweiñ kaba dei ka khynnah pule jong ka St. Anthony’s College kaba la pule ha ka Political Science, na ka liang ka kolej ka la pynlong ïa ka prokram pynkup burom ïa katei ka samla ha ka 2 tarik u Nailur 2024 hadien ba ka la shah jied ban mihkhmat ïa ka Jylla Meghalaya sha ka jingïakob Femina Miss India 2024 ka ban sa wan.
Ïa kane ka jingïalang pynkup burom la pynlong ha ka jaka pule jong ka kolej kaba la ïashim bynta da ki nonghikai, ki samla pule, bad ki nongshah khot sngewbha kiba la ïalum lang ban rakhe ïa ki jingjop bad ki jingnoh synñiang jong ka samla Angelia.
Haba ai jingkren ha katei ka prokram, u Principal ka St. Anthony’s College, u la pynpaw ïa ka jingsngew sarong bad ai khublei kitbok-kitrwiang ïa katei ka samla ka ban mihkhmat ïa ka Jylla ha ka rynsan ïakob Femina Miss India 2024.
“Ka Angelia ym tang ba ka la nang bha ha ka pule puthi, hynrei ka la kiew bha ruh ha ka kam imlang sahlang, khamtam eh ha kaba ïasaid na ka bynta ka hok jong ki kynthei bad ka jingïaryngkat shynrang bad kynthei. Ngi sngew sarong haduh katta-katta ba kan mihkhmat ïa ka Meghalaya ha ka jingïakob Femina Miss India 2024 ba pawnam, bad ngi ngeit skhem ba kan pynlong ïa ka Jylla jong ngi bad ïa ka kolej jong ngi kaba sngew sarong,” la ong u Principal.
Ka jingtrei jong ka Angelia halor ka Maitshaphrang Movement bad ka jingïadon bynta jong ka bad ka EARMACS, ban kyntiew ïa ka roi ka par ha ki nongkyndong ha ri Khasi bad Meghalaya, la pynpaw kum ki jingnoh synñiang kiba dei ban ïaroh sha ka jingkiew ha ka imlang sahlang.
La rakhe ruh ïa ka kam model jong ka Angelia, kaba kynthup ïa ka jingïatreilang bad ki brand ba pawnam bad ka jingïashim bynta ha ki jingïalang ba pawnam kum ka Delhi Times bad ka Lulu Fashion Week. Ka nam lahduh kaba dang shen jong ka kum ka Femina Miss India Meghalaya 2024 ka la ithuh kum ka mawsiang ban poi sha ka jingïakhun ha ka kyrdan jong ka ri.
Katba ka samla Angelia, haba ai jingkren, ka la pynpaw ka jingsngewnguh ïa ka St. Anthony’s College kaba ka long ka jaka pule kaba la ai shibun ki jinghikai bad jingmyntoi kiba pynlong ïa ka kumba ka long mynta.
“Ka St. Anthony’s College ka la long ka jaka pule jong nga, bad ki jinglong bad ki jingshemphang kiba nga la ïoh hangne ki la long ka atiar ban pynwan dur ïa nga sha ka briew kaba nga long mynta. Nga don ka burom ban mihkhmat ïa ka Meghalaya bad ban rah ïa ka pateng jong kane ka jaka pule ha ryngkat bad nga katba nga dang ïakhun ha ka jingïakop Femina Miss India 2024”, la bynrap ka samla Angelia.
Ha kane ka jingïakob kaba long ha ka sien kaba 60, kin don ki nongïashim bynta na baroh 29 tylli ki Jylla bad ki nongmihkhmat na ka bynta ki Union Territories.
Ka nongjop ha ka Femina Miss India 2024 kan mihkhmat ïa ka India ha ka jingïakop Miss World kaba 73 ha kaba ka Miss India kaba dang don mynta, ka Nandini Gupta na Rajasthan, kan pynphong pansngiat ïa ka nongjop ha katei ka jingïakhun.
