Shillong, Nailur 04
U Symbud Myntri Rangbah u Bah Prestone Tynsong uba peit ïa ka tnat District Council Affairs u la pynshai ïa ki nongrim ba pynjlan biang ïa ka samoi treikam jong ka Khasi Hills Autono-mous District Council (KHADC) bad Jaiñtia Hills Autonomous District Council (JHADC) sa hynriew bnai namar ba donkam kham bun ka por ban pynbiang ïa ki jingdonkam kiba ïadei bad ka jingpynkhreh ïa ka ilekshon khamtam hadien ba la pynbeit ïa ki konstitwensi ha baroh ar tylli ki district council.
Haba ïakren bad ki nongthoh khubor ha ka Sngi Balang, u Bah Prestone u la ong ba ka Sorkar ka la leh katkum ki kyndon ka Sixth Schedule ban pynjlan ha ka sien ba-ar ïa ka samoi treikam kine ki ar tylli ki district council namar ki kyndon ki shah ban pynjlan haduh shisnem.
U la ong ba ki daw kiba donkam ban pynjlan biang sa hynriew bnai ban pynbit-pynbiang ïa ki jingdonkam kynthup ïa ka jingdonkam ïa ka por ban pynmih ïa ki kyrteng jong ki shnong kiba la dep pynbeit katkum ba ki hap ha ki konstitwensi ba la pynbeit thymmai, nangta ban wanrah katto-katne ki jingpynkylla hapoh ka AD Rules halor ka jingpynbeit konstitwensi, ka jingpynkhreh ïa ki kyrteng ki nongthep vote bad ka jingpynmih ïa ka thup kyrteng kaba la pynbeit thymmai (revised electoral roll), nalor ka jingpynbiang ïa ki kor thep vote (Electronic Voting Machine -EVM) ha kaba yn pan ruh ïa ki EVM kiba thymmai na ka kompani kaba shna EVM kaba la ithuh da ka Election Commission.
U la ong ba kine baroh ki jingpynbit -jingpynbiang kiba la batai haneng ki dei kiba donkam bha ïa ka por ba da ki bnai.
U Bah Prestone u la ïathuh ruh ba shen ki briew na ka kompani ba shna bad pynmih EVM kiba dei ki karikor (engineer) kin sa wan sha Shillong ban khmih bniah ïa ki EVM kiba la don lypa bad yn sa donkam shuh shuh ban pan EVM thymmai la kumno kumno kumba 2 hajar tylli, bad la antad ba kawei ka EVM kan poi T. 15,000.
“Lada ym pynjlan ïa ka samoi treikam sa 6 bnai yn nym lah ban pyndep ïa ki jingpynbit-jingpynbiang bad jingpynkhreh ïa ka ilekshon bad ïa ka ilekshon yn pynlong ha shwa ban kut ka samoi kaba la pynjlan naduh 5 tarik Nailur, 2024 haduh ka 5 tarik Lber, 2025,” la ong u Bah Prestone.
U la ong ba ka jingpynjlan por sa 6 bnai ka dei kaba don nongrim bad la leh katkum ki kyndon ka Sixth Schedule, hynrei ki don pat ki briew kiba pynsngewthuh bakla ba ka Sorkar ka pynjlan por namar ka la tieng ïa ki seng saiñ pyrthei ban ïakhun ïa ka ilekshon
“Kam don satia kum kata (jingtieng) namar la leh ïa kane namar ka jingdawa jong ka kam bad ha ka ilekshon, ïa ki seng saiñ pyrthei kiba ïakhun ïa ka ilekshon ka shong ha ki kyrtong ha man la ki konstitwensi. Ban pynlong ïa ka ilekshon kam dei kaba ngi lah ban leh noh mynta mynta, hynrei hap ai kyndon pa kyndon kaba donkam ïa ka por ban pynkhreh,” u la pynshai u DyCM.
Haba kylli halor ka jingbei ïa ki jinglut-jingsep ban pynkhreh ïa ka ilekshon, u la ong ba bunsien ka Sorkar ka ju ïa pynbeit bad ki district council ban mang pynlut da kaba ïakheiñ pat bad ka pisa kaba ki district council ki dei ban ïoh kum ka bhah na ka Sorkar.
Kumta ka Sorkar kan thaw lad kumno ban pynbiang ïa ki jinglut-jingsep khnang ba ka kam kan ïaid beit ha ka jingpynkhreh ban pynlong ïa ka ilekshon.
Halor ka jingkynthoh u nongïalam ka VPP u Bah Ardent Basaiamoit uba la kynthoh ba ki MDC kiba mynta ki dei kiba la kut por bad ki long kum ki dawai kiba la kut por haba dih ïa ki lah ruh ban ïap pynban, u Bah Prestone u la ong, “ngam kwah kynthoh ïano-ïano hynrei kum kita ki jait ktien ban ong ïa ki MDC ba ki dei kiba la kut por (expiry date) ki dei ka jingkren kaba shabar na ka longbriew-manbriew, namar ka Riti Synshar ka shah ban pynjlan bad ngi ïaid katkum ki kyndon ha kaba ki MDC ruh kim kwah pynjlan hynrei ka dei ka jingdawa jong ka kam kaba pynlong ban pynjlan bad u Lat ka Jylla ruh u ai ka jingmynjur ban pynjlan sa hynriew bnai hadien ba la rai da ka Kynhun Myntri.”
