Shillong, Nailur 04
Ka Meghalaya State Pollution Control Board (MSPCB) ka la ïoh ban khang tala noh shwa ïa kiba bun ki karkhana kiba don hapoh ka Industrial Unit ha Byrnihat namar ka jingpynkheiñ ïa ki kyndon bad ka jingbym ryntih ïa ki jingbthah ba la dep ban ai da ka MSPCB.
Kane ka jingshah khang tala jong kiba bun ki karkhana ka la long ha ka por ba ka la don ka jingleit hiar jurip ba la lamkhmat da u Principal Secretary ka tnat Forest & Environment u Sampath Kumar, IAS, ha ryngkat ki ophisar na ka Meghalaya State Pollution Control Board (MSPCB) kaba la pynlong ka jingjurip kaba bniah bha ha kine ki karkhana ha Byrnihat ha ka 3 tarik mynta u bnai.
Kane ka jingleit jurip ka long ruh kum shibynta ban bthah ban pyntreikam ïa ki kyndon ïada mei mariang bad ruh ki lad ki lynti ban ïada ïa ka koit ka khiah jong ki paidbah bad ruh ba kane ka jingjurip ka la long ruh halor ka jingïoh jingtip ba kine ki karkhana kim kohnguh ne bud ïa ki jingbthah ba la ai da ka MSPCB.
Ha kane ka jingjurip, la lap ba kane ka ‘industrial unit’ kam shym la don ïa ka meter kaba la pynwandur ha ka rukom kaba paka na ka bynta ka Pollution Control Device (PCD), kaba buh ka jingkylli bad jingsngewkhia kaba jur halor ka jinglah ban thew bad ïada ïa ka lyer bih kaba mih. Shuh shuh, ka jingjurip ka la pynpaw ruh ba ka PM2.5 level ka la long kaba kiew bha, kaba la shim jingkheiñ ha ka 64.2 ?g/m³. Kane ka pynpaw ba ka jinglong ka lyer kaba mih na kane ka jaka, kam long satia kaba khuid bad kaba buh jingma ïa ka koit ka khiah, lada ka PM2.5 level ka kiew palat ïa ka 35 ?g/m³ ha ki 24 kynta.
Lah ban kdew hangne ba ka MSPCB ha ki por ba la dep ka la dep ban pynmih bun tylli ki jingbthah sha ka ‘industrial unit’, ban peit bniah bad shimkhia ha kaba ïadei bad ka jingpynmih ïa ka lyer jaboh ne lyer bih, ban ïada ïa ka jingjaboh jong ka mariang bad ruh ban ktah ïa ka koit ka khiah jong ki nongshong shnong kiba sah marjan bad kane ka jaka. Hynrei wat hadien ba la dep pynmih kine ki jingbthah, ki karkhana ha kane ka industrial unit kim shym la lah satia ban pyntreikam ïa ki lad jingïada kiba biang, kynthup ban pynbiang ka jingpynïaid jong ka Pollution Control Device (PCD) bad ka jingpyndait jong ka Online Continuous Emission Monitoring System (OCEMS).
Halor kane ka jingpynkheiñ ïa ki kyndon, ka MSPCB ka la dep ban pynmih da ka ‘closure notice’ ne ban phah khangtala ïa baroh kito ki karkhana kiba pynmih ka tdem ne lyer bih, kaba ki la lap ha kane ka jinghiar jurip, kata ba kin hap ban sangeh shisyndon ïa ka jingtreikam tad haduh ba kin da pyndep ïa baroh ki jingbthah bad ki kyndon ïada mariang.
