Shillong, Nailur 04
Ka kmie jong u Steve Jyrwa, ka Kong Bibi Jyrwa ka la ïathuh ba wat ka puron jong ki phlim Hindi ka Karishma Kapoor ka la shohbiej haba ka la ïohi ba ki sem da ka ‘Dhara’ haba ki leit sha Mumbai ban sakhi lang haba u khun jong ki, u Steve Jyrwa u poi mynta ha ka top-6 ha jingïakop shad India Best Dancer kaba saw ba la pynïaid da ka SonyTv.
Haba ïakren kyrpang bad ka Kong Bibi Jyrwa bad ka meiieid Kong Sita Jyrwa ki la pyntip ba lada u Steve Jyrwa u shah jied sha ka final ki la pynkhreh ban rah da ka dhara ban ai sngewbha ïa ka Karishma Kapoor kaba dei ka nongbishar. Kumta ki la kyrpad ïa ki paidbah ban poi sha ka final donkam tang ka jingkyrshan lang baroh da kaba ñion da ka ‘vote’ bad kin sa pyntip pat ynda la ïoh ïa u number.
U Steve Jyrwa u dang 17 snem ka rta, u dei u khun ba ar jong ka Kong Bibi Jyrwa uba sah ha Nongmensong, Shillong. U dei u khun bym don kpa shuh, ka kmie ka hap bylla shong die jaiñ ha Khyndai Lad ban bsa ïa saw ngut ki khun.
Namar u kpa jong u Steve u la khlad noh, la shimti noh ka meiieid naduh dangrit bad haduh mynta wat na Mumbai ruh ki ithuh ïa ka meiieid ka Kong Sita Jyrwa namar u Steve u kham ieid ïa ka meiieid namar la sumar naduh dangrit.
Ka Kong Sita ka la ïathuh ba namar u don jingshitom ha ka met, ka la phah sumar kylleng ki jaka hynrei khlem ïadei. Kumta ka la rai ban phah noh ban hikai shad ha kawei ka jaka ha Polo ha ka por ba u dang dap 9 snem.
“Hadien ba u la sdang hikai shad ki la sdang biang ki kjat hynrei namar u nonghikai shad um da thikna nga la phah hikai shad ha Nongmensong ba la hikai da ka Zarina Jyrwa kat haduh ba un poi shaduh ka top-6 haduh Mumbai,” ka la ong
Ka Kong Sita ka la sngew sarong ban sem dhara haba ka poi ha Mumbai khamtam lei haba ïoh kiew sha rynsan kaba u khun u don mynta ha jaka ïakop shad. Ka don jingkyrmen ba u khun ksiew un poi sha final da ka jingkyrshan ki paidbah ka jylla.
