Shillong, Nailur 04
U Myntri Rangbah ka Jylla u Conrad K Sangma u la pynpaw ba ka jingstad jong ka juk kaba mynta kan ym don jingeh eiei ban pynlong ïa ki tamasa put-tem (concert) ha madan ïalehkai phutbol jong ka Jawaharlal Nehru Stadium kaba don ha Polo.
Haba pynpaw ha ki lad pathai khubor, u Conrad u la ong ba manla ki ri ha ka pyrthei ki ju pynlong ïa kiba bun ki tamasa kum ka tem ka put ha ki madan ïalehkai kampher lada ka dei ha ka madan ïalehkai kriket ne phutbol.
Kane ka jubab jong u Myntri Rangbah ka la wan hadien ka jingmih bun ki jingkylli bad kren bynñiaw na kiba bun ki paid ‘riew ieit phutbol hadien ba ka Sorkar Jylla ka la thmu ban pynlong ïa kawei ka concert ha u bnai Nohprah ha JN Stadium, Polo kaba long ka madan kaba dang shu dep ban pynlong ïa kawei na ki jingïalehkai group jong ka 133rd Durand Cup bad kumjuh ïa kawei ka quarter final bad semi final.
U Myntri Rangbah u la pynshai ba ha kane ka juk kaba mynta don ki kor teknoloji kaba u phlang jong katei ka madan baroh kawei lah ban tap bad ki paidbah ki lah ban ïeng ha ka madan khlem da pynjot pynpra ïa u phlang uba la thung kyrpang ha kane ka madan. “Ki lah ban don ruh ki katto-katne ki bynta kiba lehse u phlang u lah ban sniew, hynrei tang hapoh hynñiew sngi yn lah ban shna bad ban pynbha biang ïa ka madan hi baroh kawei,” u la bynrap.
Shuh shuh u Myntri Rangbah u la ong ruh ba naduh kaba sdang ka la don lypa ka jingthmu ba ïa ki madan yn lah ban pyndonkam ïa ki ha kiba bun ki tamasa hynrei u la ong ba ki nongpynlong ïa ki tamasa kin hap ban shim ïa ka jingkitkhlieh ban pyndonkam ha ka ban tap ne siang ïa ki kynja rynsan kiba paka ha baroh kawei ka bynta jong ka madan khamtam ha kaba dei bad ka madan ba ïalehkai phutbol.
