Nongstoiñ, Nailur 05
Ka Hynñiewtrep Youth Council (HYC) Nongstoiñ Circle ha ka Sngi Palei ki la hiar ban pynlong ka jingkhynra drok ha Them ïew Nongstoiñ, ha kaba la lap ïa ki phew ngut ki samla kiba dang muja ka dih drok.
Ïa kane ka jingkhynra la pynlong hapoh ka jingïalam u samla Redyfernandy Sun, President HYC Nongstoin Circle bad samla Iainehskhem Ryntathiang, General Secretary ryngkat ka jingdonlang u samla Lumlang Kharsyiemlieh, President HYC West Khasi Hills bad samla Wanteibok Lyngdoh.
Ha ka kyrwoh khubor ba la phah da ka HYC lyngba ki nongïalam ki jong ka, ka la ong ba ka seng ka la sneng bad kyntu ïa kine ki samla bad kala phah wan ïa kiba haïing hasem ban ïakren kiba kwah sumar bad kala maham ruh ba nangne shakhmat kim dei shuh ban dang shong hapoh ïew namar ka pynsyier ïa ki paidbah bad nongshong ïew.
U samla Redyfernandy Sun u la ong, ka seng kan ïai bteng bad kim kwah ba une u ksuid drok un kharoi, dei na kata ka daw ba kum ka seng ka mih ban maham ban sneng ïa ki bad ka seng ka pynrem ïa ka Sorkar katkum ka RTI ka HYC Sengkmie la lap ba tang na West Khasi Hills la ïoh kurup haduh 9.2 kilo u drok ha ki 4snem eiei. Ka HYC ka kylli bad ki paidbah ki kwah tip haei phi buh haba wat baroh ka jylla la thang tang 1 kilo tam kiba ha West pat dep thang lut.
Shuh shuh ha ka kyrwoh khubor, ka HYC kala buh jingkylli ruh ïa ka tnat Pulit ha West Khasi Hills District ha kaba kala pynpaw ba ha ka jingïalang hapdeng ka HYC West Khasi Hills bad u DC bad SP ka West Khasi Hills la ïa kut ban patrolling ne ïaid pahara man ka janmiet ban wanrah ka jingshngaiñ ki nongshong ïew bad ki paidbah kumba la dawa ka HYC hynrei shaei kata.
