Shillong, Nailur 05
U Rakkam A Sangma uba long uwei na ki nongïalam ka National Peoples Party (NPP) bad u MLA ka Rongara Siju u la ong, ka bha palat lada ka Voice of the Peoples Party (VPP) ka don jingthmu ban pynïar ïa ka seng sha rilum Garo, naba kum ki seng saiñ pyrthei kim dei ban don u pud u sam ban trei bad shakri paidbah.
“Kum ki seng saiñ pyrthei ba la ïoh jingithuh, ki lah ban treikam ha baroh kawei ka jylla bad kane kan plie lad ïa ki paidbah ban jied bad bishar ïa kano kaba ki imon bad kwah,” la ong u Rakkam A Sangma uba long ruh u Myntri Sorkar haba kren sha ki lad pathai khubor ha ka sngi Palei halor ka jingpaw ki khubor ba ka VPP ka kwah ban pynïar sha rilum Garo.
U Rakkam u la ong, “Nga don ka jingsngew ba kum ki seng saiñ pyrthei ki dei ban rung bad poi sha ki jaka ba kyndong kynshrot hapoh ka jylla, bad ai pat ha ki paidbah ïa ka lad ba kin bishar. Don kiba kwah rung VPP, UDP bad sha kiwei ki seng. Kane ka long kaba bha, namar kan lah ban weng noh ïa ka jingpyrkhat bapher bapher kaba kum ki paidbah ki don, don kiba pyrkhat ba ka NPP ka seng ka seng Garo, ka VPP ka dei ka seng Khasi-Jaintia, ka UDP na kawei ka thaiñ, ka Congress na kawei ka thaiñ, ka BJP ka seng Hindu bad kumta ter ter, kumta ban shai halor kane, ka biang palat ban don ka jingthmu ban pynïar ha baroh kawei ka jylla.”
Shuh shuh u Rakkam u la ong, “Hadien ka jingjop kput jong ka VPP ha ka ilekshon MP kaba dang shu dep na Shillong, ka jingthmu pynïar sha rilum Garo kan treikam bha namar nga la ïoh jingtip ba kane ka la ktik ïa kiba bun bad ruh ki la don kiba kwah ban rung noh sha ka VPP. Kan long kaba biang ban don ka jingthmu pynïar ïa ka seng, namar kane kan lah ban pynkut noh ïa ki jingpyrkhat bapher bapher jong ki paidbah ban kheiñ seng Garo ïa ka NPP bad seng Khasi-Jaintia ïa ka VPP.”
Ha kawei pat ka liang, u la ong ba haba phai sha ka histori, ki seng saiñ pyrthei kum ka HPU bad ka UDP ki la dep ban sei ïa ki nongïalam bad MLA na rilum Garo, ka HPU ka la pynmih ïa u Sengran Sangma, Projen D Sangma, ka UDP ïa u BG Momin, kumta kane kan shong eh ha ki kyrtong bad ki nongïalam kumno ban treikam.
“Kiba bun ki la ong ba ka NPP ka dei ka seng Garo, hynrei phi la ïoh pat ba ki paidbah kylleng ki la pdiang ïa ka bad ha kaba ka la kiew bad khlaiñ bha ban long syndon ka National Party, ha kaba ngi la don ha Arunachal Pradesh, Manipur, Nagaland nalor ka Meghalaya,” la ong u Rakkam.
