Mawkyrwat, Nailur:
Ki lai tylli ki shnat treikam jong ka KSU kaba kynthup ïa ka KSU Lawbah Border Area Circle, KSU Balat Border Area Circle bad ka KSU Sawsymper Circle sa shisien ki la pynlong biang ïa ka jingpakhang ophis ha ka 3 bad 4 tarik mynta u bnai hapoh jong ka Mawsynram C&RD Block na ka bynta ban kyntiew kyrdan noh ïa ka Mawsynram C&RD Block sha ka Civil Sub-Division.
Katkum ka kyrwoh khubor na u samla Macdonald Marbaniang, General Secretary KSU Sawsymper Circle u la ïathuh ba ki dkhot jong ka seng ha ka jingleit jurip ki la lap ba baroh ki ophis sorkar ki la khang lut naduh ka ophis jong u BDO, ophis PHE, Forest, PWD (roads), ICD, FEDCO, Post Office bad kiwei kiwei ki ophis kiba hap hapoh jong ka Mawsynram C&RD Block.
U samla Macdonald Marbaniang u la ong ruh ba ka seng ka ai khublei kyrpang biang ïa baroh ki paidbah bad khamtam eh ïa ki nongtrei ophis kiba la ai ka jingkyrshan pura ïa kane ka pakhang ophis jong ka seng.
Shuh shuh u la ong ba seng ka kyntu ruh ïa ka sorkar ba ka dei ban sngap ïa kane ka jingdawa ba shongnia jong ka seng bad ki paidbah ban kyntiew kyrdan sha ka Civil Sub-Division ïa ka Mawsynram namar ka dei ka C&RD Block kaba la slem tam hapoh ka jylla.
U samla Macdonald u la ong ruh ba ka seng sa shisien kan sa ïoh ban ïa shong pyrkhat biang bad ki nongïalam kiba kynthup naduh ki nongïalam hima, nongïalam shnong, nongïalam raid bad ki ‘riew rangbah jong ka dong ka thaiñ Mawsynram na ka bynta ban pynkhlaiñ shuh shuh ïa kane ka mat jingdawa Civil Sub-Division ha ka 11 tarik mynta u bnai ha ka por 11:30 mynstep ha Mawsynram.
Ha katei ka sngi kan don ruh ka jingwah ïa ki banner ha manla ki ophis sorkar, ki dong ki thaiñ bad ki shnong bahap hapoh ka Mawsynram Block baroh kawei.
