Shillong, Nailur:
Ki nongrep na Mawkynrew Block ha East Khasi Hills District ki la pynpaw lada tad ki mar rep ki nongsor kiba sah ha Shillong ki kmen bad lada kiew dor pat ki sngewsih.
Ïa kine ki kyntien, ki nongrep ki la pynpaw ha ka jingïalang ba la khot da ka National People’s Party (NPP) Farmers Front Meghalaya State Unit kaba la long ha shnong Maw-U-Sam ha ka Sngi Balang ka 4 tarik Nailur 2024.
Na ka Farmers Front NPP la mihkhmat da u Bah HM Shangpliang uba bat kum u Chairman bad Bah Kansing Lynshiang kum Secretary.
Ha kane ka sngi ki nongrep palat spah ngut kynthup ïa ki longkmie bad ki rangbah kiba la poi ha kane ka jingïalang kiba kynthup ïa ki nongkitkam ka NPP Mawkynrew Block. Ka jingkhot jingïalang ka NPP Farmers Front ïa ki nongrep ka long ban sngap ïa ka ïa ka jingeh jong ki nongrep.
Ki nongrep ki la pynpaw ba u phan u rem dor ha Ïewduh mynta namar ba duna ban pynmih ki mar rep na lum namar ba ka sniew ka rep ka riang.
Ki la ong lada mih bha pat ki mar rep kum u phan bad kubi ka dor ha ïew ka hiar bha bad ki nongsor ki kmen bha.
Haba ai jingkren ha kane ka jingïalang u Bah HM Shangpliang kum u Chairman u la ong ba ka NPP hapoh ka jingïalam u Conrad Sangma uba dei ruh u Myntri Rangbah ka jylla bad Bah Prestone Tynsong kum u Symbud Myntri Rangbah, ki kwah ban wanrah ïa ka jingkylla ban pynpoi ka jingïarap sha ki nongrep.
U la ong ba ïa ka skhim FOCUS yn sa sam biang ban poi beit ha kti ki nongrep namar nangne shakhmat kan don ka jingpynjanai, kumta ka NPP kan shimti ban pynpoi ki jingïarap ha man ki nongrep jong ki block.
U la ong ba kane ka kynhun nongrep ka lah ban wan biang sha Mawkynrew block lada donkam bad sa sha thaiñ War namar ka rukom rep ka pher na thaiñ Lum.
“Ngi la ïohi ïa ka jingeh jong ki nongrep ba phi la mad, ngi kwah ban ïoh sngew ïa ka jingeh jong phi, ngin da thoh bha ban leit pynsngew sha ki ophisar ka tnat rep,” u la ong.
U la ong ruh ba hap ban pynsngew sha ka Myntri ka tnat rep ka riang ka jylla ka Kong Ampareen Lyngdoh, ne shaduh u Symbud Myntri Rangbah ka jylla Bah Prestone Tynsong bad sha u Myntri Rangbah ka jylla u Conrad K Sangma.
Katba u Bah Kansing Lynshiang u la ong, haba ki nongrep ki la pynpaw kin sa shong ha ka komiti ban ïakren bad u Bah Prestone Tynsong bad kumjuh ruh bad u Conrad K Sangma.
