Jowai, Nailur:
U BDO ka Wapung C&RD Block uba peit ruh ïa ki skhim bylla 100 sngi ne ka MGNREGA jong ka Lumshnong C&RD Block, u la pynshai halor ka jingkynnoh jong ki VEC kiba hap hapoh ka Lumshnong C&RD ba ïa ki bill jong u Snem Mang Tyngka (FY) 2023-24 la dep ban pyllait sha baroh ki VEC.
Katkum ka jingkynnoh ki VEC, la pynpaw ba dang sahkut (pending) ki bill naduh u snem FY 2021-22, 2022-23 bad 2023-24 bad kine ki dei ki jingtrei kiba sahteng na ki VEC kiba slem ban pyndep ïa ki jingtrei bad slem ban phah ïa ki bill sha ka shlem treikam.
Ïa kine ki bill la dep ban pynrung hapoh ka MIS ha u snem 2024-25 bad yn pyllait ynda la ïoh ïa ka song pisa jong u snem 2024-25.
Baroh ka pisa kaba ïadei bad u Snem Mang Tyngka jong u 2023-24 la dep ban pyllait sha ki VEC kiba la dep ban phah. Katba ki bill jong ka Lumshnong C&RD ki dei jong u Snem Mang Tyngka 2024-25 ka ban sa siew hadien ba ïoh pisa.
U BDO ka Wapung u la pynpaw ïa ka jinglyngngoh ba wat hadien ba la dep pynshai ïa ki VEC hapoh ka Lumshnong C&RD. Bun ki VEC ki sngewthuh ïa kane, tangba tang katto-katne ki VEC kiba kynnoh.
Kumta u la kyrpad ïa kine ki VEC ban wan sha ka shlem treikam bad ban wanrah ryngkat ïa ki bill ba sahteng (pending material bills) jong ki snem kiba dang sah ban siew naduh u snem 2021-22, 2022-23 bad u 2023-24, khnang ban ïoh ban pynshai, bad na ka liang u BDO u la ban biang ba la dep ban pyllait ïa ka pisa haduh u snem 2023-24.
