Shillong, Nailur 05
Wat hapdeng ka jingban ka jingduk bad ka jingkyrduh haïing-hasem hynrei ka khlem khanglad pat ïa kawei ka samla kaba don ka jingangnud ban pyndep ïa ki jingpule jong ka kiba kham shalor ba kin shu long lehnohei.
Kawei ka khynnah samla ïa kaba la tip kyrteng kum ka Sweety Mary Kharwar kaba dang pule ha ka kyrdan BA 3rd Semester hapoh Pongkung JJM Nichols Roy ka la pynpaw ïa ka jingaikhublei ïa ka kynhun SPARK kaba la ïarap ïa ka ban jingkyrshan lem ha ka pule puthi jong ka.
Ka SPARK ka dei ka kynhun kaba ai jingïarap ïa ki khynnah kiba la iehnoh ïa ka jingpule tang shiteng por na ka daw ka jingban eh ka jingduk-jingkyrduh haïing-hasem bad ba ki kmie ki kpa kim lah shuh ban kyrshan skul ïa ki.
Haba ïoh ban ïakren bad kane ka samla hadien ba la wai ka prokram jong ka jingrakhe dap 10 snem ka SPARK bad ha kajuh ka por kaba dei ka sngi rakhe ïa ka sngi kynmaw burom ïa ki nonghikai ha ka 5 tarik u Nailur 2024, ka la ong ba ka dei ha ka por ba ka dang shong klas 9 ka la mut ban sangeh noh ka jingpule jong ka namar ka jingbym lah shuh ban kyrshan naïing nasem hynrei ka dei lyngba ka jingïarap jong ka SPARK ba ka la lah ban bteng biang ïa ka jingpule jong ka tad haduh ba kan da poi ha ka BA 3rd Semester.
Katei ka samla ka la ai mynsiem lem ruh ïa kiwei de ki para samla kiba wan na ki longïing-longsem kiba duk ba kyrduh ba kim dei ban ailad ba ka jingduk bad jingkyrduh kan khanglad ïa ka jingpule jong ki hynrei ki dei ban wad ka lad ka lynti bad hangta kin sa shem ha ryngkat ka jingduwai ha u Blei khnang ba kin lah ban jam shakhmat ha ka jingim jong ki.
“Ym dei ba tang ka jingduk ne ka jingkyrduh ba kan khanglad ïa ka jingpule hynrei lada phi wad ka lad ka lynti phin sa shem namar nga la duwai ha u Blei ba kumno ngan ïoh ka lad ba ngan pule biang namar nga sngewbynnud ban iehnoh ïa ki kam pule jong nga”, ong ka samla Sweety.
