Shillong, Nailur 05
Ka jingangnud ki nongkitkam bad nongkyrshan ka Congress ba ki MDC kim dei shuh ban ïatreilang bad ka National People’s Party (NPP) ha Khasi Hills Autonomous District Council (KHADC) kam pat urlong haduh mynta. Kumta ka jingkylli na kiba bun ka long hato ki MDC ka Congress ki dang bynnud ban mih noh na ka Executive Committee?
Haba ïakren bad u MDC ka Congress u Bah PN Syiem uba dei ruh u Deputy Chief Executive Member (Dy CEM) ka KHADC u la ong ba ka Congress Parliamentary Party (CPP) kaba don 2 ngut ki MDC ka dang ap ïa u President ka seng ban wan na ka bynta ban ïakynduh bad ïasyllok halor ka rai kaba la shim da ki nongkitkam ka seng ban weng noh ka jingkyrshan ïa ka Executive Committee kaba ïalam da ka NPP.
“Ngi dang ap ïa u President ka seng ban khot ïa ki MDC ban ïakren halor ka rai ki nongkitkam bad nongkyrshan ban weng noh ka jingkyrshan ha KHADC,” la ong u Bah PN Syiem.
Ka Congress ka don sa tang 2 ngut ki MDC ha KHADC, u Bah PN Syiem bad u Bah Ronnie V Lyngdoh.
Ka Congress naduh ba ka ïatreilang bad ka NPP ha KHADC ka duh ïa ki MDC kiba kynthup ïa u Bah Carness Sohshang u MDC ka Mawkyrwat bad Bah Batskhem Ryntathiang u MDC ka Mairang konstitwensi.
Ka Congress bad ka NPP ki la ïatreilang hapoh ka kynhun synrop kaba tip kum ka Khasi Hills Democratic Front (KHDF) naduh u Jylliew 2023.
Lada ka Congress ka weng noh ka jingkyrshan, ka NPP ka dang lah ban synshar marwei ha KHADC.
Kumba ka long mynta, ka UDP ka don ha ka Liang Pyrshah ha kaba u MDC ka Sohra uba dei ruh u CEM barim u dei u nongïalam ka Liang Pyrshah.
