Nongstoiñ, Naitung 01
Ka ophis jong ka District Medical & Health Officer (DMHO), West Khasi Hills District, lyngba ka National AYUSH Mission, ha ka sngi Balang ka la rakhe ïa ka International Day of Yoga kaba khadar ha Nongstoiñ College, Nongstoiñ, halor ka phang “Yoga for Healthy Ageing” (Ka Yoga na ka bynta ka jingim kaba koit ba khiah ha ka rta) ha kaba ka Hema Nayak, IAS, Deputy Commiss-ioner ka West Khasi Hills District kala long kum ka kongsan.
Ka Hema Nayak haba kren kum ka kongsan ha ka jingïalang ka la ban jur halor ka jingdonkam ban pynrung ïa ka yoga ha ka jingim ba man ka sngi, namar ka ïarap ban pynkhlaiñ ïa ka met, ban pynbha ïa ka koit ka khiah ka bor pyrkhat bad ban wanrah ïa ka jingim kaba koit kaba khiah ha baroh ki rta.
Ka la ong ruh ba ha kine ki sngi, bun ki samla ki mad ïa ki jingeh kum ka jingkyrni palat ha ki smartphone, ka jingkhuslai, ka jingsngewsih, ka jingduh jingkyrmen bad bun kiwei pat ki jingeh kiba ïadei bad ka koit ka khiah ka bor pyrkhat.
Ka Deputy Commissioner ka la pynpaw ruh ïa ka jingsngewkhia halor ka jingkiew jong ka jingïap noh da kaba shim ïa la ka jong ka jingim ha Meghalaya bad haba bishar bniah ïa kine ki jingjia, bun na ki, ki mih na ka jingsngew duh jingkyrmen, ka jingkhuslai palat bad ki jingeh kiba ïadei bad ka koit ka khiah ka bor pyrkhat.
Ka la bynrap ruh ba bunsien ki rangbah kim sngewthuh pura ïa ki jingeh ba ki samla ki ïakynduh, kumta ka long kaba donkam ban don ki lad kiba lah ban ïarap ïa ki ban pynïoh jingjai jai ha ka jingmut jingpyrkhat.
Ka la ong ba tang da kaba pynlut 5 haduh 10 minit man ka sngi ha ka yoga bad ka ban pynleit jingmut, lah ban pynjai jai ïa ka jingmut jingpyrkhat, pynduna ïa ka jingkhuslai, pyndam ïa ki jingpyrkhat kiba sniew, pynbha ïa ka jingïohi jngai bad pynkhlaiñ ïa ka bor ban ïakhun pyrshah ïa ki jingeh jong ka jingim.
Shuh shuh ka la kyntu ïa ki briew jong baroh ki rta, khamtam ïa ki samla, ban pynlong ïa ka yoga kum shi bynta na ka jingim ba man la ka sngi.
Ka la ong ba watla ka yoga kam lah ban weng lut ïa baroh ki jingeh, hynrei ka lah ban ïarap shibun ban pynjai jai ïa ka jingmut jingpyrkhat bad ban ïalam sha ka jingim kaba koit, kaba kmen bad kaba ïaid beit.
Lah ban kdew ba ka bynta kaba kongsan jong ka prokram ka long ka jingïashim bynta ha ka Common Yoga Protocol, kaba la ïalam da Dr. B. Rympei bad ki nongwan ïashim bynta ki la leh ïa ki yoga bapher bapher, ki jingpynhiar mynsiem bad ki jingpyrkhat jingïasuk (meditation) kiba pynkhlaiñ ïa ka met, ka jingmut bad ka mynsiem.
Ha kane ka sngi la donlang ruh Dr I. Mawthoh, Principal ka Nongstoiñ College, Dr. W. Sutnga, Dr. M. Nongrum, District Nodal Officer (AYUSH), Dr. B. Ryntathiang, Dr. B. Rympei, Dr. Kordor Thongni, bad Dr. D. Kharbani, ryngkat bad ki ophisar bad ki nongtrei ka tnad ka Koit ka Khiah, ki nongtrei ka AYUSH, ki nonghikai, ki samla pule ka Nongstoiñ College bad ki paidbah.
