Shillong, Naitung 01
Ka Sanwaka Surong kaba dei ka ‘thei samla na Shillong ka la pynpaw ba ka jingïoh phong ïa ka pansngiat ïakop ‘thei bhabriew ne ka Miss Universe Meghalaya 2026 ka dei ka jingpynshlur jong ka kmie ha ka por ba ka dang don ha kane ka sla pyrthei.
Ka Sanwaka ka la ïoh rah ïa ka jingjop ka dei ha ka jingïakhun kaba la long ha ka 1 tarik Jymmang 2026 kaba la long ha Lariti Hall kaba don ha Mawkasiang, New Shillong. Ka Sanwaka kan sa mihkhmat ïa ka Meghalaya ha ka Miss Universe India ka ban sdang naduh 18 tarik mynta u bnai Naitung ha Jaipur ka ban ïaid baroh shi bnai katba ïa ka phainal ki nongpynïaid kin sa pyntip.
Ha kane ka jingïakop ‘thei bhabriew ka Sanwaka kan sa ïakhun palat 51 ngut ki samla kiban mihkhmat na kylleng ki Jylla bad kiba jop ha kane ka jingïakop kin mihkhmat ïa ka ri India.
Ka Sanwaka ka dei ka samla kaba trei mynta bad ka Hello Meghalaya kaba dei ka rynsan jong ka Sorkar Jylla ban kyntiew ïa ki sap jong ki samla naduh ki kam ak phlim ka rwai bad kiwei de ki sap hynrei ka la ïoh lad ban leit ïakhun ïa kane ka jingïakop ka dei na ka jingaimynsiem na kane ka ophis.
Haba ïakren bad ka Sanwaka ka la ïathuh ba kam shym la don kata ka mynsiem ban ïakhun ‘thei bhabriew hynrei ha u 2018 haba ka la don ka tamasa Cherry Blossom ka kmie ka la phah ïakhun namar ïalade kam shym la ïoh ha ki por samla kumta ka kwah ïa ka ban ïakhun.
“Haba nga la leit ‘audition’, hadien artaïew nga la shah jied ban leit ïakhun ïa kane ka jingïakop bad nga la ïoh rah ïa ka First Runner up” ka la ong.
Ka la ïathuh ba hadien ar bnai pat ka jingsngewsih ka la wan ha ka jingim jong ka namar ka kmie kaba ai mynsiem ka la khlad noh na kane ka pyrthei hynrei ki hynmen pat ki la ai mynsiem ban ïakhun sa ïa ka Miss Meghalaya.
Shuh shuh ka la ïathuh ba ka la ïoh ban ïakhun ïa ka Miss Teen India ha Jaipur kaba la poi ha ka Top-5, ka la ïakhun ïa ka 18th Sunsil Mega Miss North East 2021.
“Hadien saw snem ba nga la sangeh ban ïakhun ïa ka jingïakop thei bhabriew, nga la ïoh ban ïashimbynta biang ha ka Miss Universe Meghalaya bad rah ïa ka jingjop” ka la ong.
Ka la ai khublei ïa kiba dei peit ïa ka Hello Meghalaya kiba la kyrshan namar ki la ailad ban mih shakhmat ban ïakhun ïa ki jingïakop khamtam haba ka la shim shuti shi bnai ban leit ïakhun ha Jaipur ïa ka Miss Universe India.
