Shillong, Naitung 01
U Symbud Myntri Rangbah ka Jylla, Bah Prestone Tynsong ha ka Sngi Balang u la ong ba ka jingmih khajna jong ka Sorkar Meghalaya ka la “hiar shi kat dei” hadien ba la map noh ïa palat T.800 klur ïa ka jingsiew ba sahteng na ka bynta ki trai kali kamai hapoh ka skhim ‘One-Time Settle-ment’ (OTS).
U la ong ba ïa kane ka rai la shim wat hapdeng ka jingshah ktah ha ka liang ka pisa-tyngka kaba kyrshan ïa ka tnad Transport, kaba pynïaid ïa 95% ïa ki kam ba ïadei bad ka leit ka wan ha ka Jylla.
“Ha ka jingïalang ka Kynhun Myntri, hadien ba u Bah Sniawbhalang u la ai ka jingbatai bniah ha ryngkat ki ophisar na ka tnad Transport, nga ong ïa phi, ka jingmih khajna jong ka Sorkar kan jin da la hiar shi kat dei,” la ong u Bah Prestone.
“Ka pisa kaba T.1,100 klur kaba phi dei ban siew – kam dei ka kam kaba suk. Kam dei ruh kaei-kaei kaba ngi lah ban shu map da kaba suk,” u la bynrap.
“Hynrei hadien ba ngi la pyrkhat bha, hapoh ka jingïalam jong u Myntri Rangbah ka Jylla jong ngi, ngi la lah ban map ïa palat T.800 klur na ka T.1,100 klur, bad ngi la khot ïa kane ka skhim ka skhim ‘One-Time Settlement’ kaba kyrpang,” u la ong.
U Bah Prestone u la kren ïa kane ha ka prokram ai khublei ba la pynlong da ka Joint Action Committee, kaba la pynkup burom ïa u Myntri Rangbah ka Jylla, u Conrad K. Sangma bad ïa ki Symbud Myntri Rangbah ka Jylla, u Bah Prestone Tynsong bad u Bah Sniawbhalang Dhar na ka bynta ka skhim OTS.
U la ong ba kito kiba don ha ka Sorkar kham ñiar ba kin ïoh ïa ka jingithuh na ka bynta kiba kum kine ki rai.
“Kawei kaba nga kwah ban ong ka long ba kham ñiar eh ba ngin ïoh ïa kum kine ki prokram ha ka kam shakri paidbah jong ngi. Namar ngi kiba don ha ka kam shakri paidbah, ngi kiba bat ïa ki kam, bunsien ngi shah kynthoh bad shah kynnoh. Tang khyndiat ngut eh kiba sngewnguh ïa kaei kaba ngi leh,” u la ong.
“Khublei ïa ki dkhot jong ka JAC na ka bynta kane ka burom. Ngi sngew burom shi kat dei eh bad phi la ai mynsiem shisha ïa ngi,” u la ong.
U Bah Prestone u la ban jur ba ki nongïalam Sorkar kim dei ki bym lah ban bakla bad u la khot na ka bynta ka jingïatreilang.
“Ngi baroh ngi dei ki briew. Sngewbha wat pyrkhat ba namarba ngi pynïaid ïa ka Sorkar, tang namarba u Conrad K. Sangma u dei u Myntri Rangbah ka Jylla, ma nga bad u Bah Sniawbhalang Dhar tang namarba ngi dei ki Symbud Myntri Rangbah, ngim ju leh bakla – nga tharai ba kata ka long kaba bakla,” u la ong.
“Ngi donkam ban ïatreilang ryngkat na ka bynta ka jingmyntoi lang jong ka Jylla Meghalaya,” u la ong.
U la batai ba kito kiba don bynta ha ka leit ka wan ki long kiba kongsan na ka bynta ka ïoh ka kot jong ka Jylla bad ki jingïadei bad ki nongshong shnong.
“Nga kwah ban ong ïa phi ba ngi sngewnguh shibun eh ïa ki jingshakri ba la ai da phi baroh. Khlem ki trai kali bad kiba don bynta ha ka leit ka wan, ngam tharai ba ngin lah ban poi sha ki bynta ba sha trai,” la ong u Bah Prestone.
“Namarkata ka daw, phi dei ka lynti kaba kongsan tam ban kyntiew ïa ka ïoh ka kot jong ka Jylla Meghalaya jong ngi,” u la ong.
U la kyntu ruh ïa ka tnad ban pyndonkam ïa kane ka lad ban jam shaphrang.
“Kumta, nga kyrpad bad kyntu ïa baroh ban shim ïa kane kum ka kabu ksiar ba la ai sha phi da ka Sorkar, bad nga ngeit skhem ba nangne shakhmat, phin sa lah ban pynroi shuh-shuh ïa ka kam jong phi ha ka liang ka leit ka wan,” ong u Bah Prestone.
Halor ka synshar-khadar u la ong, “Lada ngi kwah ban thap kti, ka jingthap shiliang kti kam pat biang. Haba ngi thap, baroh ar tylli ki kti ki dei ban wan lang.”
Haba ai jingmut ïa ka seng ban ïai bteng ban pynleit jingmut, u la bynrap, “Ki don bun kiba klet ïa ka lynti namarba ki shah pynthut. Ngi peit phutbol man ka miet ha ka por ‘World Cup’. Ngi ïohi ïa ki nongïalehkai bapher-bapher – don kiba ïoh ‘Red-Card’, don kiba ïoh ‘Yellow-Card’. Hynrei lada phi peit bha ïa ki kyndon, phin ïohi ba u nongïalehkai uba ïoh ‘Red-Card’ ne ‘Yellow-Card’ bunsien um ïoh ban thep kol naba u shah pynthut.”
“Kynmaw, kum ka seng, wat shah pynthut. Kynmaw ban ïaid na kawei ka jaka sha kawei pat khnang ba phin kiew ha ka kamai-kajih jong phi. Bad ym tang katta, nga kyrpad ïa ki nongshong shnong jong ka Jylla – ka jingkdew kti ïa kiwei kam poi shano-shano ruh,” u la ong.
