Shillong, Naitung 01
Ka Synjuk Ki Nongdie Jaiñ ba ju shong die jaiñ ha Khasi Market ha ka Sngi Balang ki la leit ban aiti da ka Dorkhas sha u Myntri Rangbah ka Jylla ban kyntu ïa ka Sorkar Jylla ban pyndep noh kloi ïa ka jingshna ïa ka jaka ba ki ju shong die jaiñ kaba don ha Motphran.
Ha ka dorkhas ba la aiti sha u Myntri Rangbah ka Jylla ka Synjuk ka la pynpaw kham mynshuwa ki shong die jaiñ ha Jaïaw Parking Lot, Motphran, hynrei ki la shah pynkynriah shipor shajrong jong ka jaka pynïeng kali Ri-Bhoi, ïa kaba ki la pynpaw ba ka ïew ïadie ïathied ka hiar bha bad kaba la ktah ïa ka kamai kajih jong ki.
La ong ba ka jinglong jingman jong ka ïew kaba ki shong mynta ka long kaba khapngiah ka lynti ban rung ban mih, ka jingsma kaba buh jingma ïa ka koit ka khiah bad bynrap ba lada jia kino-kino ki jingjia kyrkieh ka long ka jingma ïa ki nongshong dukan bad ki nongwan thied.
Haba kren sha ki nongthoh khubor ka Kong Larisuk Ranee General Secretary ka SKNJKM ka la pynpaw ba ki don kumba 86 ngut kiba ju shong dukan bad ki la buh ka jingkyrpad ïa ka Sorkar ba kan pynbiang ïa ki jingdonkam kumba ki la dawa kum ka lynti ba rung ba mih kaba kylluid, ka jingheh ki dukan.
Ka la ban jur haba ïadei ka jinghiar ka ïew bad ka ïadie ïathied namar ka jinghap ban kynriah na parking Jaïaw shajrong ka jaka ïeng kali Bhoi, hynrei ka la pynpaw ka jingkyrmen ba ynda la dep ka Sorkar ban tei ïa ka jaka ba thymmai ka jingïadie ïathied kan long biang kum ha ki por ba la dep. Namar kata ki la kyntu jur ïa ka Sorkar ba kan pyndep noh kloi katba lah ïa katei ka jingtei bad ban pynurlong ruh ïa ki jingdawa ba ka Synjuk ka la pynsngew sha ka Sorkar.
